Елжан Біртановты үйқамақта ұстау мерзімі ұзарды
Ол бюджет қаражатын талан-таражға салды деп айыпталуда
Нұр-Сұлтан қаласының ауданаралық тергеу соты экс-министр Елжан Біртановты үйқамақта ұстау мерзімін 2021 жылдың наурыз айының соңына дейін ұзартты. Бұл туралы Біртановтың қорғаушысы Дмитрий Куряченко мәлімдеді.
«Тергеу оның үйқамақта отыруын ертерек – 12 ақпанда шешіп қойған. Мерзім наурыз айының соңына дейін ұзартылды», - деді Дмитрий Куряченко.
Ол Мемлекет басшысы Қасым-Жомарт Тоқаевқа Біртановтың заңсыз қуғындалып жатқанын және мұны тоқтатуын сұрап хат жазғанын айтты.
Еске салайық, экс-министр Елжан Біртанов 2020 жылдың 25 маусымында қызметінен кеткен болатын. Оның ұсталғаны туралы ақпарат 3 қарашада жария болды. Біртановты бюджеттің ірі көлемдегі қаражатын талан-таражға салды деп айыптап жатыр. Қазір ол үйқамақта.
