ШұғылҚазақстанда өткен тәулікте 857 адамнан коронавирус инфекциясы анықталды

Нұр-Сұлтанда есірткіге тәуелді жандарға арналған сенім телефоны іске қосылды

Орталық 109 нөмірі арқылы наркологиялық мәселе бойынша тәулік бойы тегін консультация береді

iKOMEK109 бірыңғай байланыс орталығының аясында наркологиялық көмек мәселелері бойынша сенім телефоны іске қосылды, деп хабарлайды Azattyq Rýhy қала әкімдігінің ресми сайтына сілтеме жасап.

Нұр-Сұлтан қаласының тұрғындары үшін наркологиялық көмек мамандандырылған қалалық психикалық денсаулық орталығы тарапынан тегін медициналық көмек аясында ұсынылады.

«Орталық қызметі психоактивті заттарға, яғни есірткі секілді дәрілік заттарға тәуелділіктен зардап шегетіндерді емдеуге, оңалтуға, оларға консультация беруге бағытталған.

26 қаңтардан бастап iKOMEK109 бірыңғай байланыс орталығы Нұр-Сұлтан қаласының тұрғындарына наркологиялық көмек мәселелері бойынша тәулік бойы 1-0-9 қысқа нөмірі арқылы консультация береді. Мобильді және қалалық телефондардан хабарласу тегін», - делінген хабарламада.

Наркологиялық тәуелділікке қатысты барлық қоңыраулар мен өтініштер жасырын режимде өңделетінін айта кеткен жөн.

Нашақорлық, маскүнемдік, құмар ойындарға тәуелділік – бұл тек бір ғана емделушінің басындағы ғана емес, оның бүкіл отбасының түйткілді проблемасы. Себебі тәуелділіктен зардап шегетіндер тек өзін емес, айналасындағының бәріне қиындық келтіреді.

Жақыныңыз психоактивті заттарға тәуелді екенін байқасаңыз, iKOMEK бірыңғай байланыс орталығына 1-0-9 нөмірі арқылы немесе төмендегі балама құралдар арқылы жүгінуді сұраймыз:

- әкімдіктің ресми сайты astana.gov.kz;
- iKOMEK109 мобильді қосымшасы (PlayMarket/AppStore);
- Telegram чат-боты (t.me/nursultanikomek109_bot);
- Smart Astana мобильді қосымшасы (PlayMarket/AppStore);
- aitu.city порталы.