Теңіз кенішінде коронавирус індеті қайта өршіді: соңғы төрт күнде 71 науқас тіркелді

Коронавирус жұқтырған науқастардың көбеюіне байланысты Теңіз кенішіне қосымша мамандар жіберу туралы шешім қабылданды. Бұл туралы Атырау облысының коммуникациялар қызметі хабарлайды.

Қараша айынан бері Теңіз кенішінде індетке шалдыққан 140 адам тіркелді, оның 71-і соңғы төрт күнде анықталған. Қазір Теңіз кенішінде 315 төсек-орындық инфекциялық стационарда он бес маман жұмыс істеп жатыр, 111 пациент емделуде. Аурухананың жүктемесі 35,2%-ті құрайды.

Денсаулық сақтау басқармасы Теңізге тағы сегіз маман жіберу туралы шешім қабылдады. Олар: екі дәрігер, екі медбике және төрт санитар.

Еске сала кетейік, бүгін Атырау облысы коронавирустың таралуына байланысты «сары» аймаққа енді.