Нұр-Сұлтанда «Сергек» камералары «қауіпті көліктерді» бірден анықтайды

Енді иелері жүргізуші куәлігінен айырылған көлік құралдарының нөмірлерін жүйе анықтайды.  Бұл туралы Нұр-Сұлтан қаласы әкімінің орынбасары Малика Бектұрова өзінің Телеграм арнасында жазды.

«Егер жолдағы камералар ондай машиналарды анықтаса, олардың қозғалысы туралы ақпарат бірден полиция қызметкерлеріне түседі.  Жүйе көлік ағынынан «қауіпті автокөлікті» жақын маңдағы полиция бекетінен 3-6 км қашықтықта анықтауға мүмкіндік береді.  Ары қарай ол жүргізушінің бағытын бірнеше секундқа дейін есептеуге болады», - деді Малика Бектұрова.

Екі аптадан астам уақыт ішінде елордалық полиция қызметкерлері алкогольдік немесе есірткілік мас күйінде көлік құралын басқарғаны үшін 108 адамды жауапқа тартты.  Олардың тоғызы бұрын жол ережесін бұзғаны үшін жүргізуші куәлігінен айырылған.