Мәжіліс зейнетақы қорындағы ақшаның бір бөлігін пайдалану жөніндегі құжатты мақұлдады

Бүгін Мәжілістің жалпы отырысында «Қазақстан Республикасының кейбір заңнамалық актілеріне экономикалық өсуді қалпына келтіру мәселелері бойынша өзгерістер мен толықтырулар енгізу туралы» заң жобасы талқыға салынып, депутаттар зейнетақы жинағындағы ақшаның бір бөлігін алуға мүмкіндік беретін құжатты бірінші оқылымда мақұлдады.

Ұлттық экономика министрі Руслан Дәленов аталмыш заң жобасы қазақстандықтарға зейнетақы жинағының бір бөлігін алуға мүмкіндік беретінін атап өтті.

«Заң жобасында азаматтардың зейнетақы жинақтарының бір бөлігін тұрғын үй жағдайларын жақсарту, емделу ақысын төлеу немесе жеке қаржы компанияларының басқаруына беру мақсатында пайдалану үшін түзетулер көзделген. Жоғары білімге қолжетімділікті кеңейту үшін мемлекеттік білім беру кредиті бойынша түзетулер енгізу ұсынылады», - деп түсіндірді министр.

Еңбек және халық әлеуметтік қорғау вице-министрі Ақмәди Сарбасовтың мәлімдеуінше, мұндай мүмкіндікке зейнетақы қорында қаржы жинаған 700 мыңнан астам қазақстандық ие болады. Алуға болатын қаржының жалпы көлемі - 1,4 триллион теңге.

Оқи отырыңыз: Зейнетақы қорындағы ақшаның бір бөлігін кімдер және қанша алатыны анықталды

Еске сала кетейік, 1 қыркүйекте Мемлекет басшысы Қасым-Жомарт Тоқаев халыққа жолдауында 2021 жылы БЖЗҚ-ның 700 мың салымшысы өз жинағының белгілі бөлігін үй алу, емделу үшін пайдалана алатынын немесе қаржы ұйымдарының басқаруына бере алатынын хабарлаған еді.

1 қыркүйектегі жағдай бойынша, Қазақстанда шотында зейнетақы жинағы бар 10,8 млн-нан астам салымшы тіркелген. Оның 5,6 млн-нан астамы ерлер болса, 5,2 млн-нан астамы – әйелдер. 6 млн-ға жуық салымшының зейнетақы қорындағы жинағы 500 мың теңгеге жетпейді.