70 мыңнан астам отбасы «Birgemiz» қорынан атаулы көмек алып үлгерді

Үш күнде 100 мың отбасыға біржолғы көмек беріледі

70 мыңнан астам отбасы «Birgemiz» қорынан атаулы көмек алып үлгерді
Фото: Батыржан Беспаев

«Birgemiz» қорынан 72 814 отбасыға 50 мың теңгеден берілді. Алматы, Шымкент, Атырау, Ақтөбе, Балқаш, Жезқазған, Қарағанды, Көкшетау, Қостанай, Қызылорда, Петропавл, Талдықорған, Тараз, Теміртау, Түркістан және Орал сияқты 16 қаланың тұрғындары атаулы әлеуметтік көмек алып үлгерді.

Ақшалай қаражат беру үш кезең бойынша жүзеге асырылады. 15 қазанда «BizBirgemiz» науқанының бесінші толқыны аяқталады. Үш күн ішінде еліміздегі 23 қалада тұратын 100 мың отбасыға көмек көрсетіледі.

Біржолғы көмек алған қазақстандықтар әлеуметтік желілер арқылы Елбасы мен «Nur Otan» партиясына алғыс білдіріп, мұның коронавирус пандемиясы жағдайында дер кезінде көрсетілген әлеуметтік көмек екенін айтуда.

«Мен жеті баланың анасымын. «Birgemiz» қорынан 50 мың теңге келіп түсті. «Birgemiz» қорына, «Nur Otan» партиясына және халықтың қамын ойлаған Елбасыға алғысымды айтқым келеді», - деді көпбалалы ана.

Шымкент қаласының тұрғыны да біржолғы көмек алғанын айтып, сүйіншіледі. 

«Жаңа ғана менің телефоныма «Birgemiz» қорынан 50 мың теңге түскені туралы хабарлама келді. Осындай қиын кезеңде қарапайым халыққа көмектесіп жатқан қорға алғысымды білдіргім келеді. Нұрсұлтан Әбішұлына көрсеткен қолдауы үшін алғысымды айта отырып, істеріңізге табыс пен гүлдену тілеймін», - деді Шымкент қаласының тұрғыны.

Нұрсұлтан Назарбаев қорының қолдауымен өңірлерге шамамен 5 млрд теңге бағытталды. Атаулы көмек көрсету – «Nur Otan» партиясының Лидері Нұрсұлтан Назарбаевтың қабылдаған шешімі.

7 санат бойынша 100 мыңнан астам азамат біржолғы материалдық көмекпен қамтылады. Олардың қатарында тұрмысы төмен көпбалалы отбасылар, мұқтаж мүгедектер, мүгедек баланы тәрбиелеп отырған отбасылар, ең төменгі зейнетақы алатын және халықтың әлеуметтік әлсіз тобына жататын зейнеткерлер, жетім балалар (тұл жетім балалар мен асыраушысының бірінен айырылған балалар), Ұлы Отан соғысының қатысушылары мен  мүгедектер жіне соларға теңестірілгендер,тыл еңбеккерлері бар.

Көмек алушылардың тізімін бұрынғыдай «Nur Otan» партиясының бақылауымен әкімдер ұсынады. Бұл ретте көмекті бұрын алмаған  азаматтар алды.

Естеріңізге сала кетейік, «Birgemiz» қоры осы жылдың наурыз айында «Nur Otan» партиясының Лидері Нұрсұлтан Назарбаевтың бастамасымен коронавируспен күрес жағдайында халықтың әлеуметтік осал топтарын қолдау үшін құрылған болатын. Осы уақыт ішінде қор қаражатынан 550 мыңнан астам мұқтаж азамат 50 мың теңгеден алды. Пандемиямен күресте алдыңғы шепте болған елорда мен Алматы қаласының 2112 медицина қызметкеріне біржолғы төлем жасалды. Пандемия басталған кезеңде Нұр-Сұлтан, Алматы және Шымкент қалаларындағы әлеуметтік әлсіз 100 мың отбасыға 5 млн маска таратылды.

Сонымен қатар, қор есебінен Түркістан облысының Мақтаарал ауданындағы Мырзакент ауылында 20 үйдің құрылысы аяқталды. Қазіргі уақытта 12 үйдің құрылысы жалғасуда.

×
Бұл желілік ресурстың ақпараттық өнімдері 18 жастан асқан адамдарға арналған.