Полиция тұрмыстық зорлық туралы көршінің де, журналистердің де ақпаратын қарастыруға міндеттеледі

Бүгін Мәжілісте тұрмыстық зорлық-зомбылыққа қатысты заң жобасы бірінші оқылымда мақұлданды. Мәжіліс төрағасы Нұрлан Нығматулиннің пікірінше, отбасындағы зорлық-зомбылыққа қатысты заңдарға еніп жатқан өзгерістер жәбірленушіден арыз алып, ұрып-соққан адамға жаза қолдану процесін барынша тездету керек.

Мәжіліс бірінші оқылымда мақұлдаған «Отбасылық-тұрмыстық зорлық-зомбылыққа қарсы іс-қимыл туралы» заң жобасы мен қазіргі заңдарға енетін өзгерістерді депутат Ирина Үнжақова таныстырды.

«Бүгін екі маңызды заң жобасын мақұлдадық. Соңғы кезде тұрмыстық дауларға қатысты статистика өсіп кетті. Шын мәнінде, кез келген дамыған елде оған жол беруге болмайды. Тікелей президент тапсырма берді, депутаттар сол тапсырмаға сәйкес осы заң жобасын әзірледі. Жаңа нормалар ел болып, халық болып, қоғам болып, отбасындағы жанжалға қарсы күресуге мүмкіндік береді. Бұл -  халқымыздың денсаулығы, өмірі және балаларымыздың болашағы үшін өте маңызды заң», - деді заң жобасы мақұлданған соң пікір білдірген Мәжіліс спикері Нығматулин.

Мәжіліс төрағасы пандемия кезінде тұрмыстық зорлық-зомбылық анағұрлым көбейгенін айтты.

«Өкінішке қарай, сарапшылар мен азаматтық қоғам өкілдері, құқық қоғау органдары ұсынып отырған көрсеткіштер қуантып отырған жоқ. Олардың айтуынша, көптеген адамдар, ең біріншіден, әйелдер мен балалар үйінде отырса да, әлі де болса тұрмыстық зорлық-зомбылықтан қорғалмаған. Бұл проблема әсіресе, пандемия салдарынан адамдар оқшауланған кезде өршіп кетті. Депутаттардың берген мәліметіне сүйенсек, 2020 жылдың 4,5 жарым айында Қазақстанда отбасындағы зорлық-зомбылыққа қатысты 47 мың факт тіркелген. Оның тек сегіз мыңы сотқа жеткен. Басқа жағдайлардың бәрінде бұзақылар, «тирандар» жазадан құтылып кетті. Міне, осы саладағы барлық заңның күші осыған ғана жетіп отыр», - деді заңды барынша күшейту керек екенін айтты Н.Нығматулин.

Жалпы, статистикаға сүйенсек, пандемия кезінде елдегі зорлық-зомбылыққа қатысты заң бұзу фактілерінің саны 25%-ға артқан.

«Ең өкініштісі, заң бұзу фактілерінің осы түрі қылмысқа ұласып жатады. Бүгін осы мәселе айтылмады. Бәлкім, белгілі бір кезеңде «Ішті, үйге келді, не болмайды дейсің» деп қабылданған шығар. Бірақ мынаны есімізден шығармауымыз керек: осындай заңбұзушылықтардың төрттен бірі қылмысқа ұласып жатады», - деді Нығматулин.

Осылайша, Мәжіліс депутаттары Үкіметтегі шенеуніктермен келісіп, бірлескен бұйрық шығармақ және сол бұйрық отбасындағы даулар мен оны жасаған адамның жазасына қатысты қағазбастылықтан айырып, керісінше, тез орындалуын қамтамасыз етпек. 

«Полиция тек жәбірленушіден емес, көршісінен, куәгерлерден түскен мәліметті, тіпті БАҚ беттерінде жарияланған ақпараттарды да заң бұзу туралы хабарлама (арыз) деп қабылдауы керек», - дейді Нығматулин.

Кенжекей Тоқтамұрат, Нұр-Сұлтан