Психолог пікірі: Шенеуніктердің жемқор атануына бірден-бір себепкер – әйелі

Бүгін, 11 тамыз күні ҚР Сыбайлас жемқорлыққа қарсы іс-қимыл агенттігі онлайн брифинг ұйымдастырып, психологпен әңгімелесті. Брифинг «Мемлекеттік қызметшілердің жұбайлары сыбайлас жемқорлық қылмыс жасауына қалай әсер етуі мүмкін» деген тақырыпта өтті.

Бұл сұраққа жауап берген Гүлбану Үмбетжанова «жалақысы аз мемлекеттік қызметшілерді жемқорлық қылмысына көп жағдайда, әйелдері итермелейтінін» айтты.

«Әлеуметтік желілерде жемқорлық жасаған азаматтардың ұсталып жатқанын жиі естиміз. Осы мәселеде «Жақындарымыз бізге қалай ықпал ете алады?» деген сұрақ бар. Жақындарымыз бейсаналы түрде болсын, бізді заңбұзушылыққа итермелей алады дегенді оңай елестетуге болады. Олар мемлекеттік қызметте жүргендерді жемқорлық қылмысын жасауға итермелеуі мүмкін. Елімізде мемлекеттік қызметкерлердің жалақысы аз екені жасырын емес. Осыған байланысты, олар жақындары тарапынан қысым көріп, күйзеліске түседі. Әсіресе, жетістікке жеткен адамдармен салыстыру жағы қатты әсер етеді.

Мәселен, мемлекеттік қызметкер үйіне келгенде, әйелінің тарапынан «Қалаймын, міндеттісің, осылай істеуің керек! » деген сөзді жиі естиді. Сондықтан, мемлекеттік қызметкер бұл сөздерден құтылатын жол іздейді. Ақша табатын амал іздейді. Және осы жерде әйелдері ерлерінің ақша ұрлауына ықпал етеді деп айтуға толық негіз бар», - дейді психолог.

Гүлбану Үмбетжанованың айтуынша, мемқызметші үшін ең жақын адамы жемқорлыққа итермелейтін нысан болуы мүмкін.

Психолог «күйеуін жемқорлыққа итермелейтін әйелдерге» тегін көмек көрсетуге, тренинг ұйымдастыруға дайын екенін жеткізді.

«Мен психолог ретінде шенеуніктердің әйілдеріне тегін психологиялық көмек көрсете аламын және онлайн форматта тренинг өткізуге дайынмын. Біз бүгін мемлекеттік қызметте қатысты көп мәселереді айттық деп ойлаймын. Мемлекеттік қызмет өте жуапты жұмыс, ал, сол қызметте жүрген лауазымды тұлғаға әйелдері мен балалары оған қолдау көрсетуі керек», - деді ол.

Кенжекей Тоқтамұрат, Нұр-Сұлтан