«Бұған ешкімнің де таласы жоқ деп ойлаймын»: Тоқаев Ақордаға Қазақстанның түпкір-түпкірінен келген мұғалімдерді жинады

Бүгін, 5 қазан – Ұстаздардың кәсіби мерекесінде президент Қасым-Жомарт Тоқаев Ақордада бір топ мұғалімді құттықтап, марапаттады, деп хабарлайды Azattyq Rýhy

Құттықтаудың алдында президент мұғалімдерге жылы сөзін арнап, ілтипат танытты. Президенттің айтуынша, мұғалімдер күні бүкіл қоғамды біріктіретін, нағыз халықтық сипаты бар, қастерлі де қадірлі мерекеге айналып отыр.

«Ұстаз – әр адамның өмірінен ерекше орын алатын тұлға. Бұған ешкімнің де таласы жоқ деп ойлаймын, бұл – бәрімізге ортақ пікір. Ұстазды ұлықтау өркениетті қоғамның болмысын айқындайтын аса маңызды қасиет саналады. Ұлт ойшылы Абай адамның адамдығы жақсы ұстаздан болатынын айтқан. Халқымыздың заңғар жазушысы Мұхтар Әуезов те «Ұстаз – ұлы есім» деп қадір тұтқан. Мұғалімдер қауымына зор құрметпен қарау, олардың ұлт болашағы үшін атқарып жатқан табанды еңбегіне алғыс айту – баршамызға ортақ парыз. Әсіресе, қазіргідей ақпараттар ағыны күшейіп, озық технология қарқынды дамыған заманда мұғалімнің рөлі әлдеқайда арта түскені ақиқат», - деді Тоқаев.

Өз сөзінде Тоқаев Қазақстан «Педагог мәртебесі туралы» арнайы заң қабылдап, мемлекеттік марапаттар тізіміне «Қазақстанның еңбек сіңірген ұстазы» атағы енгенін еске салды.

Және Қазақстанда бірнеше мұғалім ең жоғары мемлекеттік награда – «Қазақстанның Еңбек Ері» атағына ие болған.

«5 қазан күні Ұстаздардың кәсіби мерекесі ретінде нақты бекіді. Біз жыл сайын бір қоғам болып осы мейрамды кең көлемде атап өтіп жүрміз. Биыл да мереке күндері барлық аймақта әкімдер мұғалімдер қауымын марапаттап, оларға ерекше құрмет көрсетіп жатыр. Ұстаздарды дәл осылай жалпыұлттық деңгейде ұлықтау ісі жалғасын табады. Бұл – мемлекетіміз үшін мән-маңызы айрықша міндет», – деді Тоқаев.