ШұғылҚазақстанда өткен тәулікте 78 адамнан коронавирус инфекциясы анықталды

Алматы облысының 30-ға жуық дәрігері карантин кезінде той тойлаған (ВИДЕО)

Олар бас дәрігердің зейнетке шыққанын атап өтіпті

29 шілде күні Алматы облысы Іле аудандық орталық ауруханасының 30-ға жуық дәрігері мейрамханада той тойлап жатқан жерінен құқық қорғау қызметкерлеріне ұсталды, деп хабарлайды Azattyq Rýhy тілшісі.

Редакцияға түскен мәліметтер бойынша, Құлжа тасжолы бойында орналасқан «Айлина» мейрамханасында Іле аудандық орталық ауруханасының бас дәрігері Майра Егембердиева бастаған ақ халаттылар қызметтік көлікте бетпердесіз отырған.

Болжам бойынша, медициналық қызметкерлер аурухананың бас дәрігері Егембердиеваның зейнетке шығуын тойлап жатқан.

Олардың жиналып отырғанын құқық қорғау қызметкерлері тұрғындардың шағымынан кейін білген. Интернетте тарап кеткен видеоматериалда мейрамхана ішінде түнгі сағат 22:00-ден кейін 32 адамға арналған мерекелік дастархан жайылып тұрғаны айтылады. Заң қызметкерлерінің келгенін білген қонақтар мекеме ішіндегі бөлмелердің біріне жасырынып, ұзақ уақытқа дейін есікті ашпай тұрған. Үлгергендері көшеге қашып, такси ұстап, оқиға орнынан іздерін суытпақ болған.

Azattyq Rýhy тілшісі аталған факт бойынша қандай іс-шаралар қолданылғаны туралы мәліметтерді білу үшін Алматы облысы Ішкі істер басқармасының баспасөз қызметіне хабарласты.

«Аталған факт Алматы қаласында болғандықтан қазіргі таңда тексерісті қалалық ІІБ мен СЭҚ қызметкерлері жүргізіп жатыр», - деді облыстық Полиция департамтентінің баспасөз хатшысы Ақбота Қуанышбек. 

Azattyq Rýhy редакциясы Алматы қалалық Полиция департаментіне аталған жайт бойынша ресми сауал жіберді.

Ал «Іле аудандық ауруханасының дәрігерлері бүгінгі таңда қызметтерін жалғастырып жатыр ма?» деген сұраққа жауап алу үшін Алматы облыстық Денсаулық сақтау басқармасына хабарласқан едік.

«Аталған факт бойынша тексерісті Алматы қалалық Полиция департаменті жүргізіп жатыр. Біздің тарапымыздан да қызметтік тексеріс жүргізілген соң, тиісті шаралар қолданылады. Ал, дәрігерлердің қазіргі таңда жұмыстарын жалғастырып жатқаны туралы ақпарат жоқ», - деді баспасөз хатшысы Ләйлім Әубәкірова. 

Айжан Қалиева, Нұр-Сұлтан