Алматы инфекционисті антибиотикті жөн-жосықсыз қабылдаудың залалы туралы айтты

Алматыдағы жұқпалы аурулар бөлімінің бастығы, фтизиохирург, фтизиопульмонология орталығының пульмонологы Абзал Малбасқанов тұрғындарға коронавирус инфекциясын, пневмонияны өз бетімен емдемеуге шақырды.

Оның айтуынша, тұрғындардың көбі коронавирус жұқтырғанын біле тұра ауруын өзі үй жағдайында емдеуге бейім көрінеді.

«Коронавирустық пневмония – вирус тудыратын ауру. Ал антибиотиктер – бактерияға қарсы қолданылатын дәрілер. Антибиотиктерді қолдану арқылы иммунитетімізді әлсіретіп, денсаулығымызға зиян келтіреміз. Сондықтан үйде антибиотиктермен өзін-өзі емдеуге болмайды», - деп түсіндірді А.Малбасқанов.

Инфекционист дәрігердің айтуынша, ауру белгілері байқалған жағдайда тез арада дәрігерге жүгіну қажет. Аурудың қалай өтіп жатқанын, қай деңгейде екендігін маман ғана анықтай алады. Қосымша клиникалық-рентгендік тексеруден өтіп, арнайы тағайындаудан кейін ғана дәрілік препараттарды қолдануға болады. Көп жағдайда осы процедуралардан өткен науқастар толық жазылуға мүмкіндік алып жатыр.

«Кейбір адамдар халықтық емдеу әдістеріне жүгініп жатыр. Оның соңы уақытты текке өткізіп алумен, асқынулармен аяқталып жатады. Кейін медициналық ұйымдарға қабылданғаннан соң емдеу шаралары басқа формада болуы мүмкін», - деді ол.

Сондай-ақ, сарапшы барлық тұрғынды профилактикалық шараларды сақтауға, салауатты өмір салтын ұстануға шақырады. Сұрақтар туындаған жағдайда 1406 немесе 3000-505 нөміріне хабарласу керек.