«Nur Otan» партиясы Жаңаөзендегі дәрі-дәрмек тапшылығын реттеуді қолға алды

Пневмония дертінің өршуіне байланысты Жаңаөзен қаласындағы дәріханаларда дене қызуын түсіретін парацетамол мен бірқатар антибактериалдық дәрілердің тапшылығы байқалды.​ Осының салдарынан қазір сұранысқа ие антибиотиктердің 18 түрі, вирусқа қарсы препараттардың 9 түрі, қызу түсіретін дәрілердің 17 түрі бойынша дәрілік препараттардың үш айлық қоры мерзімінен бұрын таусылып отыр.

Осы жағдайға байланысты партияның бақылау комиссиясы қалалық штаб мүшелерімен бірігіп дәріханаларға мониториг жүргізуді бастап, бақылауға алды.

«Nur Otan» партиясы Жаңаөзен қалалық филиалының төрағасы М. Ибағаровтың тапсырмасына сәйкес Жаңаөзен қаласы әкімінің орынбасары​ Ғ.Байжанов пен «Атамекен» ҰКП Жаңаөзен қалалық филиал жетекшісі Н.Алпамысовтың жүргізген келіссөздері нәтижесінде​ Жаңаөзен қаласындағы дәріханалар мен медициналық мекемелердегі дәрі-дәрмек жетіспеушілігі мәселесі шешіліп, дәрілердің топтамасы келді.​ Жаңаөзенге тасымалданған медициналық тауарларды қалалық партиялық бақылау комиссиясы қадағалайды. Бүгінде «Медсервис Плюс», «Инкар Актау» ЖШС дәріханалары жеткілікті мөлшерде парацетамол, асперин, клексан, фраксипарин, гематон, ацитромицин, аспирин-кардио сияқты дәрілік заттарымен қамтамасыз етілді. «Инкар Актау» ЖШС-ға жеткізу қызметінің үлгермеуіне байланысты «Өзенинвест» МКК-нан арнайы көлік бөлініп, Ақтау қаласынан сатылымға шыққан дәрі-дәрмектер жедел алдырылды.

Партия төрағасы М.Ибағаров кәсіпкерлік саласына жетекшілік ететін қала әкімінің орынбасары Ғ. Байжановқа және партиялық бақылау комиссия мүшелеріне жағдайды қатаң бақылауда ұстауды тапсырды.