Елорда әкімдігі бастауыш сынып оқушылары үшін «кезекші сыныптардың» қалай жұмыс істейтінін түсіндірді

Бүгін Нұр-Сұлтан қалалық Білім басқармасының басшысы Шолпан Қадырова мектептер мен колледждердің жаңа оқу жылына дайындығы туралы айтты.

Оның айтуынша, 2020-2021 оқу жылында елорда бойынша 202 мың мектеп оқушысы болады деп күтілуде (Өткен оқу жылында 182 279 оқушы болған). Бірінші сыныпқа 27 мыңнан астам оқушы қабылдау жоспарланып отыр. Бүгінге дейін 12 453 өтініш беріліп, 10 090-ы қабылданды (37%). Құжаттарды қабылдау электронды үкімет eGov.kz порталы арқылы және қағаз түрінде мектептерде жүргізілуде. Колледждерде алдағы оқу жылында 8 мың студент, сондай-ақ 13 мамандық бойынша ерекше білім алу қажеттілігі бар 139 білім алушы қабылданады деп күтілуде (өткен жылы – 12 мамандық бойынша 105 баладан болды).

«1 қыркүйекте жаңа оқу жылы барлық елорда мектептерінде 1-11 сыныптар және колледждерде қашықтан оқыту форматында басталады. Бұл ретте қатаң санитарлық шараларды сақтай отырып, бастауыш сыныптың оқушылары үшін «кезекші сыныптардың» жұмысы жоспарлануда. Оның қалай жұмыс істейтінін түсіндіре кетсек. Бастауыш сынып оқушыларының ата-аналарының өтініші негізінде санитарлық талаптарды сақтай отырып, «кезекші сыныптар» ашылатын болады. Оқу бірнеше ауысыммен жүзеге асады. Сыныптар кіші топтарға бөлінеді. Ол топтарда оқушы саны 10-15-тен аспайтын болады. Сабақтар бір кабинетте өткізіліп, үзіліс әр түрлі уақыттарда болады. Сонымен қатар сабақтардың бір бөлігі қашықтан жүргізіледі», – деді Ш. Қадырова.

Басқарма басшысы санитарлық шаралардың сақталуы басты міндеттердің бірі екенін атап өтті.

«Ол үшін мектептер дезинфекциялау құралдарымен, тепловизорлармен, қорғаныс құралдарымен қамтамасыз етіледі. Дәстүрлі форматтағы оқу жағдайында, яғни кезекші сыныптардың жұмысы үшін алгоритм келесідей болады: ата-аналар балаларын «кезекші сыныптарға» әкеледі, бірақ ғимаратқа кірмейді; мектептің кіреберісі дезинфекциялық кілемшелермен қамтамасыз етіледі; мектепке кірер кезде баланың температурасы өлшенеді; қолды антисектикпен өңдеу және масканың болуы міндеттеледі; барлық қабаттарда және әрбір «кезекші сыныпта» антисанитайзерлерді орнатылады; сыныпты желдету, кварцтау және ылғалды жинау кестесі; қызыл сызықпен белгілей отырып, медициналық кабинеттердің жанында изолятор-бөлме ашу», – деді басқарма басшысы.

Ол сондай-ақ қашықтан оқытудың қалай өтетінін айтты.

«Қашықтан оқыту үшін ең алдымен педагогтар мен оқушылардың компьютер және интернетпен қамтамасыз етілуі маңызды. Педагогтар мен оқушылардың компьютер мен интернетке қажеттілігіне мониторинг жүргізілді. Қажетті құралдар сатып алынатын болады. Бұл ретте техниканы қажет ететін аз қамтылған және көпбалалы отбасылардан шыққан оқушылар міндетті түрде компьютерлермен және роутерлермен қамтамасыз етіледі», – деді Ш. Қадырова.

Басқарма басшысы жаңа оқу жылында оқушылардың 100% оқулықтармен қамтамасыз етілетінін айтты. Оқушылар оқулықтарды 1 қыркүйекке дейін алады.