Қазақстан Қытайдағы Сиань теміржол институтының білім беру бағдарламасын ресми түрде сертификаттады

Жақында Қытай мен Қазақстан халықаралық білім беру бағдарламалары мен ресурстарын дамыту аясында маңызды жетістікке қол жеткізді. Сиань теміржол кәсіптік-техникалық институты әзірлеген «Теміржол көлігі технологиясы» мамандығы бойынша білім беру бағдарламасы Қазақстан Республикасының Оқу-ағарту министрлігіне қарасты «Talap» коммерциялық емес акционерлік қоғамы (кәсіптік білім беруді дамыту орталығы) тарапынан ресми аккредитациядан өтті, деп хабарлайды Azattyq Rýhy ұйымның баспасөз қызметіне сілтеме жасай отырып. 

Бұл құжат Қазақстанның білім беру жүйесіне ресми түрде енгізілген алғашқы қытайлық кәсіптік білім беру бағдарламасы ретінде тарихқа енді. Аталған жетістік Қытайдың кәсіптік білім беру тәжірибесінің Қазақстанның оқу жүйесіне жүйелі түрде ене бастағанын білдіреді.

«Сондай-ақ, бұл қадамды «Қытай – Орталық Азия» саммитінің стратегиялық шешімдерін жүзеге асыруға, «Бір белдеу, бір жол» бастамасын қолдауға және «Цинлин шеберханасы» (Qinling Workshop) халықаралық жобасын дамытуға бағытталған маңызды бастама деуге болады. Жобаны іске асыру барысында Сиань теміржол кәсіптік-техникалық институты Қазақстан мен Орталық Азия елдеріндегі кәсіптік білім беру талаптарын жан-жақты зерттеді. Екі елдің жетекші сарапшылары бірнеше кезеңнен тұратын талқылаудан кейін ғылыми негізделген келісімдерге қол қойды”, - деп хабарлайды «Talap» ұйымының баспасөз қызметі.

Осылайша, тек «Теміржол көлігі технологиясы мамандығы» бағдарламасы ғана емес, сонымен қатар «Жоғары вольтты жабдықтарды сынау» атты онлайн курс, «Теміржол көлігі туралы» және «Жоғары жылдамдықты теміржол қытай тілі (бастапқы деңгей)» оқулықтары әзірленген.

Қазір негізгі білім беру бағдарламасы барлық тексерулерден сәтті өтіп, Қазақстанның уәкілетті органдары тарапынан ресми түрде мақұлданды.

Айта кетейік, 1956 жылы негізі қаланған Сиань теміржол кәсіптік-техникалық институты – теміржол және қалалық рельсті көлік саласына мамандар даярлайтын Қытайдың солтүстік-батыс өңіріндегі жетекші оқу орындарының бірі. Бүгінде институтта 40-қа жуық мамандық бойынша 16 000-нан астам студент білім алады және 700-ден астам оқытушы қызмет етеді. Жыл сайын оқу орны көлік саласына шамамен 5000 білікті техникалық маман дайындайды.

Соңғы жылдары институт халықаралық ынтымақтастықты белсенді дамытып, Ресей, Қазақстан және басқа да 8 елмен серіктестік орнатқан. Қазір «Бір белдеу, бір жол» бастамасы аясында білім беру саласында елеулі нәтижелерді көруге болады.

Болашақта қолда бар  онлайн курстар мен оқулықтар Қазақстанның білім беру платформаларында жарияланып, оқу процесіне енеді. Бұл ресурстар Алматы көлік және коммуникациялар колледжі мен Алматы энергетика және байланыс университеті сияқты жетекші оқу орындарының бағдарламаларына да еніп, жергілікті ерекшеліктерге бейімделмек.