Бірінші сынып оқушылары мектепке ата-анасының жазбаша өтінішімен бара алады
Оқушылар бірінші тоқсанды түгел қашықтан оқуы мүмкін
Жаңа оқу жылында бірінші сынып оқушылары мектепке ата-аналарының жазбаша өтінішімен бара алады. Бұл туралы Білім және ғылым министрі Асхат Аймағамбетов мәлім етті.
«Бірінші сынып оқушылары биылғы оқу жылы мектепте ата-аналарының жазбаша өтінішімен дәстүрлі форматта оқи алады. Егер ата-аналар эпидемиологиялық жағдайды көре отырып, рұсқатын берсе, біздің міндетіміз - оларға жағдай жасау. Бұл категориядағы балалар бірнеше ауысыммен оқиды. Яғни, бір сыныпта 10 оқушыдан артық отырмайды және бір сыныпқа бір мұғалім ғана сабақ беретін болады. Қоңырау үзілістері мен мектепке бару уақыттары да арнайы кестеге сай жүргізіліп, мектептерде барлық санитарлық нормалар сақталады», - деді министр.
Бірақ ағылшын, музыка, дене шынықтыру сынды кейбір сабақтар жалпы бастауыш сыныптары үшін онлайн форматта өтеді.
Айта кетейік, елдегі эпидемиологиялық жағдайға байланысты мектеп оқушылары биылғы оқу жылының бірінші тоқсанында қашықтан білім алады деп жоспарланып отыр.
Айжан Қалиева, Алматы
