Нұр-Сұлтанда университет пен колледж түлектері коронавируспен күреске жұмылдырылды
Олар арнайы оқудан өтті
Нұр-Сұлтанда Астана медицина университеті мен медициналық колледждің 200-ден астам түлегі пандемия жағдайында жұмыс істеуді үйреніп, арнайы оқудан өтті. Бұл туралы қала әкімі Алтай Көлгінов Instagram парақшасында жазды, деп хабарлайды Azattyq Rýhy тілшісі.
«Олардың барлығы жұмысқа алынып, COVID-19-бен күреске көмектесіп жатыр. Бүгінде тағы 120 түлек оқудан өтуде. Медицина университеті мен колледждің жалпы 500-ден астам түлегі COVID-19-бен күреске жұмылдырылмақ. Оларды емханалар, ауруханалар, стационарлар мен жедел жәрдем станцияларына жібереміз. Бір бөлігі жұмысқа кірісіп те үлгірді», - деп жазды Көлгінов.
Оның айтуынша, COVID-19 науқастарын емдеуге арналған төсек-орындар санын көбейту бойынша жүйелі жұмыс жүргізіліп жатыр.
«Пандемия басталғалы жұқпалы аурулар төсек-орындары саны мыңнан 4 мыңға дейін ұлғайтылды. Осылайша стационарлар саны 3-тен 14-ке дейін артты. Эпидемиологиялық ахуал күрделенуі мүмкін екені ескеріліп, тағы 1,5 мың орындық резерв дайындалды. Ол үшін арнайы жабдықталған 800 төсек-орын сатып алынады», - деп жазды ол.
Қала әкімінің айтуынша, жақын арада өкпені жасанды желдететін 200 аппарат, 500 флуометр, 500 оттегі концентраторы, екі компьютерлік томограф жеткізіледі.
