ІІМ қоныс колонияларындағы сотталғандарға ұялы телефон ұстауға рұқсат бермек

Ішкі істер министрлігі қауіпсіздігі барынша төмен түрмелердегі сотталған азаматтарға колонияның аумағынан тыс жерде ұялы телефон пайдалануға рұқсат беру туралы бұйрық жобасын ашық талқылауға шығарды, деп хабарлайды Azattyq Rýhy.

Бұйрықтың жобасы «Ашық нормативтік құқықтық актілер» порталында жарияланған. Айта кетейік, Қазақстанда абайсызда қылмыс жасаған, бірінші рет жеңіл қылмыс жасаған адамдар жазасын өтейді. Бұндай колониялардың ережесі басқа түрмелерге қарағанда жеңілдеу. Яғни, азаматтар колония аумағынан қалаға сұранып шыға алады, туыстарының жанына барып тұра алады, колония аумағында кәдімгі киім кие алады.

Енді ішкі істер министрлігі бұндай колониядағы сотталғандарға колония аумағынан шыққанда смартфон пайдалануға рұқсат бергісі келеді.

Қағидаларға әртүрлі негіздер бойынша өзгерістер көзделген. Соның ішінде:

• мінез-құлқының үшінші оң дәрежесі бар сотталғандар үшін «тыныштық сағатын» енгізу;  
• сотталғандарға мекемеден тыс жерде смартфондарды пайдалануға рұқсат беру (жазасын өтеу шарттарын жақсарту);
• қауіпсіздігі барынша төмен мекемелеріндегі сотталғандардың кездесулер және қалаға шығу туралы өтініштерді терминалдар арқылы айту.

Бұйрық жобасы 11 наурызға дейін талқыланады.