$ 504.34  556.34  5.97
ҚАЗ
×
Бұл желілік ресурстың ақпараттық өнімдері 18 жастан асқан адамдарға арналған.
09.07.2020, 14:53
Қоғам

Көкшетауда мемлекеттік бағдарлама аясында жөнделген үйдің тұрғындары базынасын айтты

Алайда, үйге жөндеу жұмыстарын жүргізген мердігер компания банкротқа ұшыраған

Көкшетауда мемлекеттік бағдарлама аясында жөнделген үйдің тұрғындары базынасын айтты

Көкшетауда тұрғын үйді жаңғырту бағдарламасы шеңберінде күрделі жөндеуден өткен ғимараттың көп уақыт өтпей қабырғасынан сыз өтіп, сылағы түсіп, кірпіштері құлай бастаған. Тұрғындар бұл мәселені қаншама рет көтергенмен, жергілікті биліктен де, мердігер компаниядан да еш қайран болмаған. Алты жылдан бері жалғасып келе жатқан кемшіліктерді түзете алмай жүрген тұрғындар Azattyq Rýhy редакциясына хабарласып, базынасын айтты.   

Тұрғындардың айтуынша, Абай көшесі, 153 мекенжайындағы тұрғын үйге осыдан алты жыл бұрын мемлекеттік бағдарлама шеңберінде күрделі жөндеу жұмыстары жасалған. Сол кезде жылдар бойы қараусыз қалған үйдің ауласына да жөндеу жасала бастаған. Бірақ, балалар ойнайтын ескі алаң сүіріліп, орнына асфальт төселіп, жөндеу жұмыстары сонымен тоқтаған. Аула жаңарады деп жүргенде, ескісіне зар болып қалған тұрғындар осы мәселе бойынша талай есікті қағып, талай табалдырықты тоздырған екен.  

«МҮЙІЗ СҰРАП, САҚАЛЫМЫЗДАН АЙЫРЫЛҒАНДАЙ БОЛДЫҚ»

«Ескі үйіміздің жөнделетініне ішіміз жылып, қатты қуандық. Мейлі, бірнеше жыл бойы 2700 теңгеден төлем төлесек те, баспанамыз түзеледі деп сендік. Алайда қуанышымыз ұзаққа созылмады. Мүйіз сұрап, сақалымыздан айырылғандай болдық. Үйдің шатырына барлық жағынан қойылған суағарлар дұрыс орналастырылмаған. Соның салдарынан сәл жаңбыр жауса болды, үйдің төрт қабырғасынан бірдей су сорғалайды. Арада көп уақыт өтпей кірпіштер түсе бастады. Бұлай жалғаса берсе, балкондарымыз құлап, біреуді жазым ете ме деп те қорқамыз. Біз партияға, қала әкімдігіне, тұрғын үй инспекциясына да шағымдандық. Әлі күнге дейін еш нәтиже жоқ. Осы жылдың 11 ақпанында қала әкімі Амангелді Смайылов тұрғындарды бірыңғай қабылдаған кезде де осы мәселені тағы көтердік. Сонда әкім бұл өтінішімізді мердігер компания арқылы түзетуге уәде берген. Дегенмен, әлі өзгеріс болмады», - дейді Абай көшесі, 153 үйдің тұрғыны Татьяна Васильевна.

Көршісінің сөзін осы үйде тұратын белсенді тұрғындардың бірі Елена Сайлыбаева да қуаттады. Оның айтуынша, жөндеу жасалғаннан кейін көзге түскен кемшіліктер туралы тиісті мемлекеттік органдарға хабарланған.

«Арыз-шағымдарды қала әкімдігінен бастап, тұрғын үй инспекциясына, тұрғын үй коммуналдық шаруашылық бөлімдеріне жаздық. Дегенмен, 2014 жылы тұрғын үйді жаңғырту бағдарламасымен жүргізілген жөндеу жұмыстарының кепілді мерзімі біз алашапқын болып жүргенде өтіп те кетті. Жарайды, осы үйдің тұрғындары жиналып, сапалы суағар қоялық. Бірақ, бізді сол жылы басталып, аяқсыз қалған ауланың жайы алаңдатады. Күзге жақын тозығы жеткен балалар ойын алаңы бұзылды. Үйдің ауласына жаңадан асфальт төселе бастады. Иә, қуанышымыз қойнымызға сыймады. Бірақ, күз түскенде ауламыз асфальт төселген күйі қалып қойды. Жаңадан салынады деген балаларға арналған ойын алаңы ұшты-күйлі жоқ. Міне, содан бері алты жыл уақыт өтті. Мәселені жыл сайын көтереміз. Бірақ, баяғы жартас - сол жартас... Комиссия келіп, суретке түсіріп, жиналыс ашып, уәдесін беріп кетеді. Қазір осы маңдағы үш бірдей үйдің ешқайсында балаларға арналған ойын алаңы жоқ. Кеш батса,фе аула тас қараңғы. Жарық қойылмаған. Балалар көше асып, арғы беттегі үйлердің ауласына барып ойнауға мәжбүр. Оларды ары-бері жүргенде жолда көлік қағып кетпесіне кім кепіл?!. Жасы тоғызға келсе де,  баламды жалғыз өзін көліктер заулаған көшеден әрі асырып, басқа аулаға барып ойнауға жібере алмаймын. Осыдан бірнеше жыл бұрын бір қыз баланы көлік қағып та кеткен. Абырой болғанда, қатты жарақат алған жоқ. Ал, ойын алаңы жоқтығынан балаларымыз жолдан өтпек болып опат болса қайтеміз», - дейді Елена Сайлыбаева.

КЕПІЛДІ МЕРЗІМ АЯҚТАЛҒАН, МЕРДІГЕР КОМПАНИЯ БАНКРОТҚА ҰШЫРАҒАН

Мәселенің анық-қанығын білу мақсатында қалалық тұрғын үй инспекциясына хабарластық. Рас, ғимарат тұрғын үй мемлекеттік бағдарламасы шеңберінде жөндеуден өткен.

«Жөндеу жасалғаннан кейін үйді авторлық қадағалау, техникалық қадағалау бойынша тұрғындар, басқа да салалардан құралған арнайы комиссия қабылдап алған. Егер кепілді мерзімі аяқталмаса, оны мердігер компания түзетуі тиіс», - дейді тұрғын үй инспекциясының бас маманы Төлеу Ақтаев.

Тұрғын үйге жөндеу жүргізген мердігер компания басшысы да кепілді мерзім уақытының өтіп кеткенін алға тартты.

«Біз осыдан бес жыл бұрын аталған үйде жөндеу жұмыстарын жүргіздік. Үйдің жертөлесін, шатырын, подъездерін түгел жөндедік. Барлық жөндеу жұмыстарын авторлық қадағалау, өрт сөндірушілер, тұрғындар, басқа да комиссия мүшелері қабылдап алды. Қателіктер болса, содан бері қайда қалды?! Үйлеріне жөндеудің қате жасалғаны бес жылдан кейін естеріне түсті ме? Кепілді мерзім үш жыл ішінде аяқталған. Менің мердігер компаниям да қазір банкротқа ұшыраған. 2016 жылы банкротқа арыз бергенмін. 2019 жылдың қазанында компания банкрот деп танылған», - дейді жөндеу жүргізген «Сапалы су» ЖШС басшысы Жаслан Ысқақов.

БЮДЖЕТТЕН ҚАРЖЫ ҚАРАСТЫРЫЛМАҒАН

Тұрғын үйдегі аула жағдайын қалалық тұрғын үй-коммуналдық шаруашылық, жолаушылар көлігі және автомобиль жолдары бөлімінің басшысынан білмек болдық.

«Бұл тұрғын үй ауласына күрделі жөндеу жасалған. Оны ұлттық сараптама орталығы бекіткен. Жобаға сәйкес, аулаға барлық абаттандыру жұмыстары жасалды, бордюрлер қойылып, асфальт төселді. Бірақ бұл жобада балалардың ойын алаңын салу қарастырылмаған. Біз тұрғын үйлердің абаттандырылуына бюджеттік өтінім бердік. Алайда, бюджетте аулаларды жөндеуге байланысты әзірге қаражат қарастырылмаған. Қаржының ыңғайына қарай биыл қала бойынша тек үш аулаға күрделі жөндеу жұмыстары жасалуда», - дейді бөлім басшысы Юрий Шедловский.

Абзал Алпысбайұлы, Ақмола облысы

Серіктес жаңалықтары