Мүфтият карантин кезінде жаназа шығару мен ас беру талаптарын бекітті

Бірер күн бұрын Түркістан облысында қайтыс болған танымал діндар Әбдіғаппар Смановтың жаназасына мыңдаған адам жиналып, бұл жайт қоғамда қызу талқыға түскен болатын. Карантин кезінде адамдардың көп жиналуына тыйым салынса да, жергілікті тұрғындар бұл талапты сақтамаған. Ал, тәртіп сақшылары, билік өкілдері қазаға келген адамдар легін тоқтата алмады.

Осы жайттан кейін Қазақстан мұсылмандары діни бірлестігі карантин кезінде жаназа намазын оқу мен ас беру талаптарын бекітті.

«Қазақта той бару, тойда тілек айту, адам өмірден кеткенде топырақ салу деген дәстүр бар. Алайда, қазір дәстүрге түсіністікпен қарап, одан да маңызды адам өмірі екеніне көңіл бөліп, адамның амандығына үлес қоссақ. Қазіргі таңда той-жиындарды тоқтатты. Адамның өмірі болғаннан кейін, өлім болады. Ондай жағдайда туыстарымен атқарып, дұғада, тілекте болсақ. Қазір бата беруді бармай-ақ, қашықтан беретін мүмкіндік бар. Сондықтан талаптарды сақтайық», - деді бас мүфти Наурызбай қажы Тағанұлы.

Ендеше, жаназа намазына қатысты талаптар мынадай:

• Жаназа намазына бір ғана діни қызметкердің қатысу;
• Жаназа намазына тек отбасы және жақын тумаларының қатысу;
• Жаназаға жалпы саны 30 кісіден артық жиналмау;
• Бойында дене қызуы немесе жөтелі бар кісінің жаназа намазына мүлде қатыспау;
• Жаназа намазына келуші кісі міндетті түрде санитарлық нормаларды (бетперде тағу, медициналық қолғап кию және екі метрден кем емес арақашықтық) сақтау;
• Індеттен қайтыс болған мәйітті дәрігердің нұсқаулығына сай жуу;
• Жаназа намазы мен уағыздың жалпы уақытын 5 минуттан асырмау;
• Жаназа намазы барысында қол алысып амандаспау;
• Жаназа намазының сабын түзегенде кемінде екі метр қашықтықты сақтау;
• Қабір басында мәйіт жер қойнына тапсырылғаннан кейін жамағатты тездетіп қайтару;
• Жасы үлкен кісілер, денсаулығы нашар адамдар (ер мен әйел) және жас балалар жаназа намаздарына қатыспау;
• Қонақ асын өткізбеу;
• Жаназадан кейінгі асты өткізбеуге немесе отбасы мүшелерімен шектелу.

Ал, құдайы астарға (жетісі, қырқы, жүзі, жылы және тағы басқа) қатысты талаптар мынадай:

• Астарды өткізбеуге немесе отбасы мүшелері, жақын тумаларымен шектелуге;
• Бір ғана діни қызметкердің қатысуына;
• Санитарлық нормаларды (бетперде тағу, медициналық қолғап кию және арақашықтық) сақтауға шақырамын.

«Шариғатта қандайда жұқпалы аурудың белгісі тараған кезде аурудың етек алуын тоқтатуда карантин режимі қажет екені атап айтылған. Мұндай карантиндік жағдай көптеген мұсылман мемлекеттерінде жүзеге асуда. Сондықтан қазіргідей көзге көрінбейтін зиянды дерт тараған кезде оның алдын алу әрбір мұсылман баласы үшін міндет», - деді ҚМДБ төрағасының орынбасары, наиб мүфти Ершат Оңғаров.