Тараздың экс-прокуроры академияның ректоры болды

Қазақстанның Бас прокуроры Берік Асылов Құқық қорғау органдары академиясының ұжымына жаңа ректорды таныстырды, деп хабарлайды Azattyq Rýhy.

«Бұл қызметке 3-сыныпты мемлекеттік әділет кеңесшісі, PhD докторы Нұрғалым Мәжитұлы Әбдіров тағайындалды. Ол бұған дейін өңірлерде және Бас прокуратурада басшылық қызметтер атқарған тәжірибелі прокурор», - деп жазған Асылов.

Айта кетейік, Нұрғалым Әбдіров Тараз қаласының прокуроры болған. Тағайындаудан кейін Берік Асылов академия алдына бірқатар маңызды міндет қойды. Оның ішінде:

• білім беру бағдарламаларын жасанды интеллектке басымдық бере отырып жаңғырту;
• жасанды интеллектті тиімді пайдалану арқылы киберқылмыс пен өзге де заманауи қатерлерге қарсы тұра алатын сертификатталған прокурорлар мен құқық қорғау органдары қызметкерлерін даярлау;
• ғылыми зерттеулердің қолданбалы сипатын күшейту;
• академияның ғылыми басылымдарының халықаралық деңгейде беделін арттыру;
• курсанттарда тәртіптілік пен мемлекетке адалдық сияқты жеке қасиеттерді қалыптастыру;
• шетелдік бейінді білім беру ұйымдарымен ынтымақтастықты кеңейту.

«Бірлесіп Академияны прокуратура мен құқық қорғау органдары үшін кадрлар мен ғылым даярлаудың орталығы ретінде нығайтатынымызға сенімдімін», – деді Бас прокурор.