Президентке соғыс жағдайында қосымша өкілеттіктер беріледі

Сенатта «Қазақстан Республикасының кейбір заңнамалық актілеріне соғыс жағдайы мәселелері бойынша өзгерістер мен толықтырулар енгізу» туралы Заң жобасы талқыланды.

Еліміздің Қорғаныс министрілігі соғыс жағдайы кезінде Президентке қосымша өкілеттіктер беру бастамасын ұсынды. Сенат депутаттарына құжатты Қорғаныс министрінің бірінші орынбасары Мұрат Бектанов таныстырды.

«Заң жобасының мақсаты –мемлекетті заманауи қауіп-қатерлер мен сын-қатерлер жағдайында қорғанысқа дайындау мәселелері жөніндегі заңнаманы одан әрі жетілдіру. Заң жобасымен жұмыс барысында жоғары білім беру ұйымдарының әскери кафедраларында студенттерді запастағы сержанттар бағдарламасы бойынша даярлау, олардың әскери ант қабылдауы мәселелеріне қатысты түзетулер бар», - деді Мұрат Бектанов.

Сенаторлар Қазақстан Қарулы күштері құрамы әлемде болып жатқан өзгерістерге бейімделіп қана қоймай, олардың алдын алуға дайын болу бағытында жұмыс істеу керек екенін атап өтті.

«Бүгінгі Заң жобасы осы тапсырманы орындауға бағытталған. Қарулы күштер мемлекет қорғанысының негізін құрайды. Сыртқы және ішкі саясатты жүргізу барсындағы басты мақсат - мемлекет қауіпсіздігін қамтамасыз ету. Қазіргі таңда әскери ұрыстардың түрі, сипаттары үлкен өзгерістерге ұшыраған, сол себепті қолданыстағы заңның принциптері мен мемлекеттің қорғаныс және қауіпсіздікті қамтамасыз ету құралдарын жаңғырту қажеттілігі туындады», - деді сенатор Дана Нұржігіт.

Заң жобасының басты жаңалығы:

1. Өңірлерде қорғаныс кеңестерін құру - бұл өз кезегінде жергілікті атқарушы органдардың жауапкершілігін арттырады.

2. Жоғары оқу орындарында ақылы негізде запастағы сержанттарды даярлау - бұл жұмылдыру резервін нығайту қажеттілігінен туындап отыр.

Заң жобасын қабылдау мемлекеттік органдардың әскери қауіпсіздік пен қорғанысты қамтамасыз етудегі жұмысын ұйымдастыруға, мемлекеттік органдар мен жекелеген аумақтарды соғыс жағдайы мен соғыс уақыты режиміне тез арада көшіруді қамтамасыз етуге, олардың жұмысын жедел ұйымдастыруға мүмкіндік береді.

«Әскери резервті толықтыру мақсатында әскери кафедрада ақылы негізде запастағы сержантты даярлау ұсынылады. Білім туралы заңға, Жоғарғы білім беру ұйымына осы бағдарлама бойынша ақылы негізде запастағы сержантты даярлау уәкілеттілігін беру туралы толықтыру ұсынылады», - деді Қорғаныс министрінің бірінші орынбасары Мұрат Бектанов.

Әсел Тұмашқызы, Нұр-Сұлтан