Тоқаев Ұлттық құрылтайда Қазақстан тәуелсіздігінің 40 жылдығын сөз етті
Президент Қазақстанның кемінде төрт салада зор мүмкіндігі бар дейді
Бүгін Бурабайда өткен Ұлттық құрылтайда президент Қасым-Жомарт Тоқаев Қазақстан тәуелсіздігінің 40 жылдығы жақындап келе жатқанын айтты, деп хабарлайды Azattyq Rýhy.
«Тәуелсіздігіміздің 40 жылдығы жақындап келеді. Осы маңызды белеске қандай жетістікпен жетерімізді, оған дейін қандай тарихи міндеттерді орындауға тиіс екенімізді нақты білу маңызды. Біз шындыққа тура қарауымыз керек. Еліміз бәрінен оза шауып, барлық салада және барлық бағытта бірінші қатарда бола алмайтынын түсінуіміз қажет. Сондықтан біз өзіміздің басқалардан басым түсетін мықты тұстарымызды жақсы білуге тиіспіз», - деді Тоқаев.
Сондықтан, президент атап өткендей, еліміз қай салада әлеуеті зор болса, сол салаларға басымдық беруі тиіс.
«Меніңше, Қазақстанның кемінде төрт салада орасан зор мүмкіндіктері бар. Осы салаларда біз өз елімізді қамтамасыз етіп қана қоймай, аймақтық, тіпті, жаһандық ауқымда ықпалымызды жүргізе аламыз. Цифрландыру ісі мен жасанды интеллект, көлік тасымалы, энергетика, агроөнеркәсіп кешені және адам капиталы негіз болады», - деді Тоқаев.
