Атом электр станциясының энергиясы көмірден әлдеқайда арзан - Бақытжан Жақсалиев

Энергетика экс-вице-министрі Бақытжан Жақсалиев Қазақстанға АЭС салу керек екенін айтты, деп хабарлайды Azattyq Rýhy.

«Атом электр станциясы елімізге керек. Онсыз  экономикалық прогресс болмайды. Бізге арзан электр энергиясы қажет. Станция энергиясы қымбат дейтіндер ол тек шартты түрде. Ауқымды қуаттылықта ол жаңартылған өзге электр қуатынан арзан болады. Тарихи, технологиялық тұрғыдан қарағанда АЭС өзінің 90 пайыз қуаттылығын көтереді»,- дейді ол.

Жақсалиевтің айтуынша, АЭС өндіретін электр энергиясын тұтыну көмір мен өзге баламалы энергияға қарағанда әлдеқайда арзанға түседі. 

«Гидростанция салу үшін шығыс және оңтүстік өңірлердің әлеуеті бар. Бірақ оның тартымдылығы болмай отыр. Сондықтан депутаттарға гидростанция салу бойынша заңнаманы қолға олу керек. Қазақстанда гидро және атом станцияларын салатын әлеует бар. Оларды міндетті түрде қолдану керек. Станциялар салу арқылы ең арзан электр энергиясына қол жеткізе аламыз»,- дейді ол. 

Еске салсақ, Астанада АЭС салу бойынша 20-сыншы жария талқылау өтті. Тұрғындар сұрақтарын емін-еркін қойып, көксекен мәселелеріне жауап алды.