«Әділетті әлем, келісім және даму үшін жаһандық бірлік» атты Қазақстанның бастамасы қолдау тапты – сенатор

Астана төрінде Тәуелсіздік сарайында Шанхай ынтымақтастық ұйымына мүше мемлекеттер басшылары кеңесінің алқалы жиыны өтті. Саммитке қатысты Сенат депутаты Бибігүл Жексенбай пікір білдірді, деп хабарлайды  Azattyq Rýhy.

«Жиын барысында делегация басшылары ШЫҰ-да 9 жыл бақылаушы болған Беларусь Республикасын Ұйымға қабылдау және оған ШЫҰ-ның мүше мемлекеті мәртебесін беру туралы шешімге қол қойды. Бұл айтулы ұйымның батысқа қарай географиялық қадамы деуге болады. Саммит қатысушылары алдында сөйлеген сөзінде Қазақстан Президенті ШЫҰ достық, тату көршілік, тең құқықтық және өзара қолдау негізінде мемлекетаралық қатынастардың тиімді механизміне айналғанын атап өтті»,- дейді депутат. 

Ол атағандай, ШЫҰ аумағында үш миллиардтан астам адам тұрады. 

«Президент ШЫҰ-ның барлық қатысушыларының белсенді қолдауының арқасында Қазақстанның төрағалық ету кезеңінде цифрлық, туристік, энергетикалық және бизнес форумдарды, сондай-ақ ШЫҰ жастар кеңесін қоса алғанда, әртүрлі деңгейдегі 150-ге жуық іс-шара өткенін айтты»,- деді ол. 

Сенатор атағандай, осы шаралардың арқасында  ШЫҰ аумағындағы сауда-экономикалық ынтымақтастық қарқынды дамып келеді.

«Қазақстан төрағалығы  кезінде мәдени-гуманитарлық байланыстарды нығайтуға ерекше назар аударды. Дипломатиядағы “жұмсақ күш” мүмкіндігінің рөлі қазір аса жоғары. Жалпы, президенттің айтуынша, Қазақстан алдыңғы саммитте мәлімделген барлық мақсаттар мен міндеттерді толық орындады. Қасым-Жомарт Тоқаев барлық елдерге қолдау көрсетіп,  Қазақстанның бастамаларын іске асыруға белсенді қатысқаны үшін шынайы алғысын білдірді. Мемлекет басшысы Шанхайдың ондығына кіретін барлық елдер үшін стратегиялық маңызы бар негізгі бағыттарды белгіледі»,- дейді ол. 

Президент бірінші бағыт ретінде қауіпсіздік саласында өзара сенім мен ынтымақтастықты нығайтуды атады.

«Мемлекет басшысы Шанхай ынтымақтастық ұйымы бүкіл Еуразия континентінде бейбітшілік пен қауіпсіздікті қамтамасыз ететін кепіл ретінде әрекет ету үшін ерекше мүмкіндіктерге ие екеніне сенім білдірді. Осы мақсатта Қазақстан бұған дейін ШЫҰ-ның «Әділетті әлем, келісім және даму үшін жаһандық бірлік» бастамасын жүзеге асыруды ұсынды. Бастаманы ұйым қатысушылары бірауыздан қолдады.Сонымен қатар, ол өз сөзінде «үш зұлым күшпен» күреске назар аудара отырып, әскери саладағы сенім шаралары туралы келісімді әзірлеу және қабылдау қажеттігін атап өтті.Киберқауіпсіздікті нығайту ШЫҰ қатысушыларының алдында тұрған тағы бір өзекті міндет ретінде аталды. Осыған байланысты Қасым-Жомарт Тоқаев ақпараттық инфрақұрылымның тұрақты жұмыс істеуін қамтамасыз ету үшін ақпарат алмасудың, озық тәжірибелер мен тәжірибелерді қолданудың арнайы механизмін әзірлеуді ұсынды»,- деді ол. 

Бибигүл Жексенбай президенттің бүгін қабылданып жатқан халықаралық ақпараттық қауіпсіздікті қамтамасыз ету мәселелері бойынша өзара іс-қимыл жоспары аталған мақсаттарға жауап береді деген пікірін алға тартты.

«Ынтымақтастықтың үшінші бағыты – тиімді дәліздер мен сенімді жеткізу тізбектерін құру арқылы көліктік байланыстарды нығайту.Мемлекет басшысы ШЫҰ-ны реформалау және жаңғырту қажеттілігіне жеке тоқталды.Қазақстан көшбасшысының айтуынша, барлық ұсынылған ұсыныстар ШЫҰ елдері бөлісетін ортақ ізгі мақсаттарға қол жеткізуге өз үлесін қосуға деген шынайы ұмтылыс сипатына ие.Соңында Мемлекет басшысы шараға қатысушылардың барлығына қолдау көрсеткені үшін алғысын білдірді. Шанхай Ынтымақтастық Ұйымына төрағалық ету Қытай Халық Республикасына өтті. Саммит жұмысының нәтижесінде ШЫҰ-ның Астана декларациясы қабылданды», - деді ол.