Ақтөбеде қала әкімінің орынбасары қамауға алынды

Ақтөбе қаласы әкімінің бұрынғы орынбасары екі айға қамауға алынды,ол аса ірі көлемде бюджет қаражатын иемденді деген күдікке ілініп отыр. Шенеунік қалалық ТКШ басшысымен бірге қазына қаражатын жымқырды деп болжанады. Бұл туралы City04.kz хабарлайды.

Жангелді Әубәкіров Ақтөбе қаласы әкімінің тұрғын үй-коммуналдық шаруашылық жөніндегі орынбасары қызметінде небары 8 ай жұмыс істеді.

«16 сәуірде Ақтөбе қаласының мамандандырылған тергеу соты екі айға, яғни 2020 жылдың 15 маусымына дейін қамауға алуға санкция берді. Ол қылмыстық кодекстің 4-бөлігі, 2-тармағы басқа біреудің сеніп тапсырылған мүлкін иемдену немесе ысырап ету бойынша күдікке ілініп отыр», - деді Ақтөбе қаласының мамандандырылған тергеу сотының баспасөз қызметі.

Еске салайық, Жангелді Әубәкіров Ақтөбе қаласы әкімінің орынбасары қызметіне 2019 жылы шілде айында келді. Оған ТКШ саласын қадағалау жүктелді. Әкім орынбасары көпір, жол жөндеу және салу, қаланы абаттандыру және жарықтандыру, сонымен қатар оны тазалыққа жауапты болған.