Президент Түркияның Сыртқы істер министрімен кездесті

Мемлекет басшысы Қасым-Жомарт Тоқаев Түркия Сыртқы істер министрі Хакан Фиданды қабылдады, деп хабарлайды Azattyq Ruhy Ақорданың ресми сайтына сілтеме жасап.

Президент, ең алдымен, Хакан Фиданды Түркияның Сыртқы істер министрі лауазымына тағайындалуымен құттықтап, оның қазақ-түрік қатынастарын одан әрі дамытуға елеулі үлес қосатынына сенім білдірді.

Сонымен қатар Қасым-Жомарт Тоқаев биыл Түркия Республикасының құрылғанына 100 жыл толатынын атап өтіп, бұл бауырлас мемлекет үшін тарихи белес екенін жеткізді.

«Бір ғасырдың ішінде Анадолы саяси, әлеуметтік-экономикалық және мәдени-гуманитарлық салада орасан зор табысқа жетті. Аймақтық және жаһандық мәселелерді шешуге белсенді және табанды түрде атсалысып, әлемнің беделді мемлекетіне айналды. Мен Түркияның ғасырлық мерекесіне орай Астана көшелерінің бірін «Анадолы» деп атауды тапсырдым», – деді Қасым-Жомарт Тоқаев.

Мемлекет басшысы Түркия – біздің аса маңызды стратегиялық серіктесіміз екеніне назар аударып, екі ел басшыларының кездесуінде жоғары деңгейдегі көптеген уағдаластыққа қол жеткізілгенін айтты.

«Бауырлас елдеріміздің қарым-қатынасы кеңейтілген стратегиялық әріптестік деңгейіне көтерілді. Түркия еліміздің негізгі төрт сауда серіктесінің біріне айналды. Былтыр екіжақты тауар айналымы 54 пайызға өсіп, 6,3 миллиард долларға жетті. Осы көрсеткішті жақын арада 10 миллиардқа жеткізуге келістік. Екі ел арасында инвестициялық ынтымақтастық қарқынды дамып келе жатыр. Түркия – Қазақстанның ең ірі 10 инвесторының бірі. Қазір жалпы құны 2,8 миллиард доллардан асатын 36 жоба бойынша жұмыс жүріп жатыр. Сондықтан екі ел арасындағы ынтымақтастықтың болашағы зор деп ойлаймыз», – деді Президент.

Хакан Фидан мемлекет басшысына президент Режеп Тайип Ердоғанның сәлемін жеткізді. Ол Түркия тарапы ортақ күш-жігердің нәтижесінде екі елдің өзара ынтымақтастығын, сонымен қатар аймақтық және халықаралық аренадағы әлеуетін бұдан да жоғары деңгейге жеткізуге ниетті екенін айтты.

Сонымен қатар Түркияның Сыртқы істер министрі президент Режеп Тайип Ердоғанның биыл қараша айында өтетін Түркі мемлекеттері ұйымының саммиті аясында өзара стратегиялық қарым-қатынас мәселелерін кеңінен талқылауды жоспарлап отырғанын жеткізді.