Тоқаев Түркістан қаласындағы «Сапар орталығының» жұмысымен танысты
Орталық қызметкерлері Түркістанға келген туристерге бағыт-бағдар береді
Мемлекет басшысы Қасым-Жомарт Тоқаев Түркістан қаласындағы «Сапар орталығының» жұмысымен танысты, деп хабарлайды Azattyq Rýhy тілшісі Ақордаға сілтеме жасап.
«Сапар орталығы» биыл іске қосылған өңірдегі маңызы зор нысан. Қазақстан Президентіне туристік нысандарды бірыңғай электронды билетпен қамту жүйесі, туристерге ұсынылатын маркетингтік ақпарат және аудиогид материалдары жөнінде баяндалды.
Жалпы көлемі 2092 шаршы метр аумақты алып жатқан орталықта 54 адам жұмыс істейді. Олар Түркістанға келген туристерге бағыт-бағдар беріп, қажетті материалдармен қамтып, заманауи талаптарға сай қызмет көрсетеді.
Қасым-Жомарт Тоқаев «Қазақ хандығы» атты залда орналасқан экспозициялармен танысты. Сонымен қатар Президент қолдан жасалған көне кілемдердің көрмесін аралап көрді.
