Алексей Цой бірнеше мемлекетті КВИ статистикасын жаңаша есептеу әдісіне көшуге шақырды

Бүгін видеоконференция арқылы байланыста Шанхай ынтымақтастық ұйымына мүше мемлекеттердің денсаулық сақтау министрлерінің отырысы өтіп жатыр. Отырысқа қатысқан ҚР Денсаулық сақтау министрі Алексей Цой ШЫҰ-ға мүше мемлекеттердің денсаулық сақтау министрлерін КВИ жағдайын жаңа үлгіде есептеу әдісі бойынша Дүниежүзілік денсаулық сақтау ұйымының ұсынысын қолдауға шақырды.

«Қазақстан коронавирус жұқтыру бойынша статистикалық мәліметтерді тіркеудің жаңа әдісін айқындады. ДДСҰ-ның Еуропалық аймақтық бюросымен техникалық жағынан кеңесе отырып, біз КВИ жағдайларын халықаралық классификацияның жаңа кодымен тіркеу туралы шешімге келдік», - деді Алексей Цой.

Еске сала кетейік, Қазақстанда 1 тамыздан бастап COVID-19 жағдайларының зертханалық тұрғыда расталуы пневмония фактілерімен біріктіріледі.

ШЫҰ-ға мүше елдердің салалық министрлері қатысқан отырыста Алексей Цой статистикалық мәліметтерді жүргізудің бұл әдісін ДДСҰ Еуропа бюросы қолдап отырғанын жеткізіп, ШЫҰ-ға мүше мемлекеттердің министрлерін де ДДСҰ ұсынысын қолдауға шақырды.