Қазақстанда ер адамдардың жартысынан астамы ішімдік ішеді - ДДСҰ

Дүниежүзілік денсаулық сақтау ұйымының зерттеу мәліметін Денсаулық сақтау министрлігінің Қоғамдық денсаулық сақтау ұлттық орталығы жариялады.

 «Дүниежүзілік денсаулық сақтау ұйымы жүргізген зерттеулердің нәтижесінде Қазақстанда ер адамдардың 44 пайызы темекі шегетіні, 54 пайызы ішімдік ішетіні анықталды. Қазақстанда алкогольді тұтыну деңгейі - Еуропа аймағындағы ең жоғары көрсеткіштердің бірі. Жастардың 57 пайыздан астамы (15-19 жас) соңғы 30 күнде бір уақытта 60 және одан да көп грамм ішімдік ішкен», - делінген орталықтың хабарламасында.

Орталықтың хабарлауынша, темекі шегу көрсеткішін төмендету үшін темекіге салынатын салықты көтеру керек. 

«ДДСҰ ұсыныстарына сәйкес, орташа және төмен кірісі бар елдерде алкогольге қарсы саясатқа қатысты ең тиімді шаралар алкогольдік ішімдіктерге акциздік салықты көтеру, алкогольді жарнамалауға тыйым салу немесе шектеулерді қабылдау және сақтау болып отыр», - делінген хабарламада.