Астанада ер адам мас күйінде көпірдің төбесіне шығамын деп сотты болды

Астана қаласының әкімшілік құқық бұзушылықтар жөніндегі мамандандырылған ауданаралық соты ұсақ бұзақылық жасағаны үшін Б.-ға қатысты істі (ӘҚБтК 434-бабы 1-бөлігі) қарады, деп хабарлайды Azattyq Rýhy.

Іс материалдарына сәйкес, ол алкогольдік мас күйде Сарайшық көпірінің құрылымына көтеріліп, қоғамдық тәртіпті бұзған және айналасындағыларға құрметсіздік көрсеткен. Бұзушылық фактісі хаттама, куәгер К.-нің көрсетілімдері және оқиға орнынан алынған бейнежазбамен расталды.

Сот отырысында Б. өз кінәсін мойындап, жасаған әрекетіне өкінетінін білдірді. Жеңілдететін мән-жай ретінде оның өкінуі, ауырлататын мән-жай ретінде құқық бұзушылықтың алкогольдік мас күйде жасалуы есепке алынды.

Сот қаулысымен Б. ӘҚБтК 434-бабының 1-бөлігі бойынша кінәлі деп танылып, 15 тәулікке әкімшілік қамауға алынды. Қаулы заңды күшіне енген жоқ.