Қостанай облысында салық режимін бұзған шаруалар 8,5 млн теңге төлеуге міндеттелді
Б.Майлин ауданында фермерлер 3,5 мың гектардан артық жерге жеңілдетілген салық төлеп келген
Қостанай облысы Бейімбет Майлин ауданында салықтық бұзушылықтар бойынша жүргізілген талдау нәтижесінде фермерлердің мемлекетке 8,5 млн теңге қарыз екені анықталды, деп хабарлайды Azattyq Rýhy.
Бейімбет Майлин ауданының прокуратурасы талдау барысында 2 шаруа қожалығы тарапынан салықтық бұзушылықтардың фактілерін анықтады.
Шаруа қожалықтарының арнайы салық режимін негізсіз қолданғаны анықталды және жеке табыс салығының 10% орнына олар бірыңғай жер салығының 0,5% ғана төледі.
«Салық төлеушілер шаруа немесе фермер қожалықтары арнайы салық режимін қолдану үшін жер учаскелерінің рұқсат етілген жиынтық ауданынан (шекті мөлшері – 3500 га) асып түсті.
Мысалы, шаруа қожалығының жалпы ауданы 3663 га жер учаскелері бар, бірақ оған 0.5% салық ставкасы қолданылды. 2023-2024 жылдары салық ставкасын төмендету нәтижесінде 814 мың теңге сомасына салық төленді.
Қадағалау актісі бойынша аудан прокуратурасы салық режимінің бұзушылықтарын жойып, шаруа қожалықтары 8,5 млн теңге сомасына салық төледі», – делінген прокуратура хабарламасында.
