Маңғыстау облысында ер адам баласына ай сайын небәрі 5 мың теңге алимент төлеп келген
Оған қатысты сот шешімі шықты
Маңғыстау облысының кәмелетке толмағандар ісі жөніндегі мамандандырылған ауданаралық соты ер адамды баласының жеке мектептегі оқу ақысының жартысын төлеуге міндеттеді, деп хабарлайды Azattyq Rýhy.
Сот әйел адамның баласының әкесіне оқу ақысы мен алимент өндіру туралы талап арызын қарады.
Талапкердің айтуынша, жауапкер ай сайын 5 000 теңге көлемінде алимент төлейді, алайда оның табысы тұрақсыз. 2024 жылдың қыркүйегінен 2025 жылдың маусымына дейін ол барлығы 48 500 теңге төлеген. Оның пікірінше, бұл сома баланы лайықты қамтамасыз етуге жеткіліксіз.
2009 жылы туған бала жеке мектепте оқиды. Ай сайынғы төлем – 85 000 теңге. 2024 жылғы оқу ақысы – 440 000 теңге, ал 2025 жылы – 525 000 теңге.
Сот талапты ішінара қанағаттандырып, шығындарды ата-аналардың екеуіне бөлді. Нәтижесінде, баланың әкесінен екі жылдық оқу ақысының жалпы сомасы 965 000 теңгенің жартысы, яғни 482 500 теңге өндіру туралы шешім шығарылды.
Ай сайынғы алиментті тұрақты ақша сомасында өндіру туралы талап қанағаттандырылмады, себебі алимент бұрынғы сот бұйрығымен тағайындалған.
Маңғыстау облыстық сотының апелляциялық алқасы шешімді заңды деп танып, өзгеріссіз қалдырды.
Белгілі болғандай, сот шешімі 2025 жылғы 10 қарашада заңды күшіне енді.
