IT-маман TikTok әлеуметтік желісін шпиондықпен айналысады деп айыптады

TikTok – әлеуметтік желі емес, адамдар туралы бүкіл деректі жинауға арналған шпиондық бағдарлама, деп жазды Rozetked порталы. Мұндай мәлімдемені Reddit әлеуметтік желісінің қолданушысы жариялаған.

Ол өзін IT-маманымын деп таныстырған. Соңғы уақытта әлеуметтік желілердің жұмысына зерттеу жүргізген ол TikTok-тың қолданушы туралы тым көп ақпарат жинайтынын аңғарған. Атап айтқанда, смартфонның параметрлері, онда орнатылған мобильді қосымшалар мен өзге әлеуметтік желілер туралы. Сондай-ақ, TikTok қолданушының нақты қай жерде жүргенін де бақылап отырады.

IT-маман Facebook, Twitter, Instagram және Reddit секілді әлеуметтік желілерді де зерттегенін жазған. Алайда, олардың ешбірі TikTok секілді қолданушы туралы мәліметтер жинамайды екен.

TikTok – 2017 жылы пайда болған әлеуметтік желі. Оны қытайлық ByteDance компаниясы жасап шығарған. Желіні негізінен жасөспірімдер мен кішкентай балалар көп қолданады. Дегенмен, Қытайдың өзінде TikTok-тың өзін емес, соған ұқсас Douyin мобильді қосымшасын қолданады.