Қазақстанның 11 облысында қар аралас жаңбыр жауады: жүргізушілерге ескерту жасалды
Мұндай ауа райы көріну қашықтығының төмендеуіне және жолдың көктайғақ болуына әкелуі мүмкін
«ҚазАвтоЖол» ұлттық компаниясының баспасөз қызметі 2025 жылғы 4 қарашада республикалық маңызы бар автожолдарда ауа райының қолайсыз болатыны туралы хабарлады, деп жазады Azattyq Rýhy.
11 өңірде жауын-шашын күтіледі
Компанияның мәліметінше, жаңбыр мен қар Алматы, Ақмола, Шығыс Қазақстан, Жамбыл, Солтүстік Қазақстан, Түркістан, Қарағанды және Павлодар облыстарында, сондай-ақ Абай, Жетісу және Ұлытау облыстарында жауады деп болжанып отыр.
Мұндай ауа райы көріну қашықтығының төмендеуіне және жолдың көктайғақ болуына әкелуі мүмкін, деп ескертеді компания өкілдері.
Жүргізушілерге сақ болу ұсынылады
«ҚазАвтоЖол» мамандары жүргізушілерге жылдамдықты шектеу, қашықтықты сақтау және қар мен мұз басқан жолдарда ерекше мұқият болу қажеттігін ескертеді.
«Осыған байланысты жүргізушілерден жылдамдық режимін және жол қозғалысы қауіпсіздігі ережелерін сақтауды, сондай-ақ жолдардағы ауа райының нашарлауын ескеруді сұраймыз. Қосымша ақпарат алу үшін тәулік бойы жұмыс істейтін 1403 байланыс орталығына хабарласа аласыз», – делінген компания хабарламасында.
