Ақтауда кәсіпкер әкімдік тартып алған теңіз жағалауындағы жері үшін 94 млн теңге өтемақы талап етті
Кәсіпкер бұл жерді 2021 жылы сатып алған
Ақтау қаласының №2 сотында Каспий теңізі жағалауындағы жер учаскесіне қатысты азаматтық іс қаралып жатыр. Кәсіпкер мемлекеттен 94 миллион теңге көлемінде залалды өтеуді талап етуде, деп хабарлайды Azattyq Rýhy агенттігі Lada.kz-ке сілтеме жасап.
Даудың мәні
Істің мәні – жергілікті әкімдіктің заңсыз қаулысымен берілген жер учаскесінің кейін мемлекет меншігіне қайтарылуында. Талапкердің өкілі айтқандай, кәсіпкер бұл жерді өңірге танымал бизнесмен, Маңғыстау облыстық мәслихатының бұрынғы депутаты арқылы сатып алған.
Жаңа иесі жағалауда туристік нысан салуды жоспарлап, жерді игеруге айтарлықтай қаражат жұмсаған. Алайда кейін сот сатып алу-сату келісімін жарамсыз деп танып, учаске мемлекетке қайтарылған.
Заң бұзушылықтар мен күдік
Сот шешімінде әкмдіктің алғашқы қаулысы жер заңнамасын өрескел бұзғаны үшін заңсыз деп танылған. Талапкердің заңгері Абай Қазтуғановтың айтуынша, жер тендерсіз, яғни бәсекелестіксіз берілген.
«Әкімдік жерді бар нысанды кеңейту үшін деп рәсімдеген. Бірақ ол нысанның өзі пайдалануға берілмеген болып шықты. Мұнда әкімдік қызметкерлері мен алғашқы жер иесі арасында мүмкін келісім болуы да жоққа шығарылмайды», — деді Қазтуғанов.
Даудың басы – 2021 жыл
2021 жылы кәсіпкер Каспий жағалауында туризм нысанын салуға жер сұрап әкімдікке жүгінген. Архитектура бөлімі бос жер жоқ екенін хабарлаған соң, ол жеке жер иесінен учаске іздеуге көшкен.
Сол кезде бұрынғы депутат оған төрт сотықтан тұратын 12 жер телімін сатқан. Алайда кейін сатып алушы өз учаскесі мен теңіздің арасында басқа меншіктер бар екенін анықтаған.
Ақшаны қайтаруды талап еткенде, сатушы оған басқа жер телімдерін ұсынған, кейін белгілі болғандай, дәл осы жерлер заңсыз жолмен алынған.
94 миллион теңгелік талап
Кәсіпкер өз шығындарын өтеу үшін 94 млн теңге көлемінде өтемақы сұрап отыр. Сотта жауапкерлер ретінде Ақтау қаласының әкімдігі мен бұрынғы жер иесі қатысуда.
Қалалық әкімдік әзірге істің мән-жайына сот шешімі шыққанша түсініктеме бермейтінін мәлімдеді.
