«Семей орманы» мемлекетке 200 млн теңге салықты толық төлемеген – прокуратура
Прокурорлық қадағалау актісінің негізінде салықтық берешек толық көлемде өтелді
Абай облысының «Семей орманы» орман резерватында 200 млн теңге салықтың толық төленбегені анықталды, деп хабарлайды Azattyq Rýhy.
Мамандандырылған табиғат қорғау прокуратурасының тексерісі нәтижесінде «Семей орманы» мемлекеттік орман табиғи резерваты» РММ 2024 жыл бойынша Салық кодексінің талаптарын бұза отырып, салық жөніндегі мәліметтерді толық көлемде жібермегені белгілі болды.
Салық кодексіне сәйкес, мемлекеттік орман иелері әр тоқсан сайын төлем жасаушылар мен салық салу нысандары туралы деректерді салық органдарына ұсынуға міндетті.
Нәтижесінде бюджетке 200 млн теңгеден астам салық түспей қалған.
«Прокурорлық қадағалау актісінің негізінде салықтық берешек толық көлемде өтелді.
Мамандандырылған табиғат қорғау прокуратурасы қоршаған ортаны қорғау және табиғи ресурстарды ұтымды пайдалану бағытындағы жұмысын жалғастырады», – делінген прокуратура хабарламасында.
