Қазақстандықтар енді Қатарда ресми түрде жұмыс істей алады
Жұмыс берушілер қазақстандықтарға тиісті жағдай жасауы керек
Сенат Қазақстан азаматтарының Қатар мемлекетінде ресми жұмыс істеу тәртібін айқындайтын екіжақты келісімді ратификациялады, деп хабарлайды Azattyq Rýhy.
Сенат аппаратының басшысы Максим Споткай Telegram-арнасында бұл құжат қазақстандықтардың Қатарда ресми түрде еңбек етуіне құқықтық негіз қалыптастырып, екі тараптың өзара міндеттемелерін белгілейтінін айтты.
«Қатардағы жұмыс беруші қызметкерлердің жолақысы мен отанына қайту шығындарын өтейді, сондай-ақ оларды тұрғын үймен, көлікпен, медициналық қызметпен және ақылы еңбек демалысымен қамтамасыз етеді», – деп атап өтті ол.
Келісім аясында мамандарды жалдау тәртібін реттейтін типтік еңбек шарты мен екі ел арасындағы өзара іс-қимылды үйлестіріп, туындайтын мәселелерді шешу үшін бірлескен комитет құру қарастырылған.
