Президент кеңесшісі денсаулық сақтау вице-министрін сынға алды

ҚР Президентінің экономикалық сұрақтар бойынша штаттан тыс кеңесшісі Олжас Құдайбергенов денсаулық сақтау вице-министрін сынға алды, деп хабарлайды Azattyq Rýhy тілшісі.

«Коронавирус біздің де компанияны айналып өтпеді. Бір қызметкерден вирус анықталды, тағы бірнешеуінде ауру белгілері бар. Біз екі апта бұрын қызметкерлердің бәрін қашықтан жұмыс істеуге жібергендіктен, ұжымда вирустың кең таралуының алдын алдық. Симптомы барлар тест тапсыруға тырысты. Дегенмен, олар тест бітті немесе алдын ала жазылуға болмайды деген жауаптармен бетпе-бет келді. Олар әлі де тест тапсыруға тырысып жатыр. Мен тест тапсыра алдым. Менен коронавирус анықталмады», - деп жазды ол әлеуметтік желідегі парақшасында.

Олжас Құдайбергенов зертханаға бармастан бұрын мобильді орталықта тест тапсыруға тырысқанын, теледидардан көліктен шықпай-ақ тест тапсыруға болатынын көргенін айтты.

«Тест тапсыру оңай көрінген. Олай емес екен. Мен мобильді орталыққа барғанда, кіреберістегілер алдын ала жазылу керек екенін айтты. Одан әрі тұрған ресепшндегілер жазылу мүмкін емес екенін, жазылу үшін таңертең сағат 10-да келіп, кезекке тұруым керек екенін жеткізді. Онлайн немесе телефонмен жазылуға болмайтынын айтты», - деп жазды ол. 

Президент кеңесшісі Қытайда вирустың анықталғанына 5 ай, елімізде карантин енгізілгелі 3 ай болғанын атап өтті.

«Саланы цифрландыруға жауап беретін денсаулық сақтау вице-министрінің немен айналысып жүргенін білмеймін. Тіпті, қарапайым құралдардың өзі қолжетімсіз», - деп жазды ол.