4,5 млн доллар шығын келген: қазақстандықтарды алдаған украиналық алаяқтар Киевте ұсталды (ВИДЕО)

Қазақстан Ішкі істер министрлігінің Киберқылмысқа қарсы іс-қимыл департаменті Украина Ұлттық полициясымен және Бас прокуратураларымен бірлесіп, Киевте ірі алаяқтық call-орталықтың қызметін тоқтатты. Арнайы операция ұзақ мерзімді жедел-іздестіру жұмысының нәтижесінде жүзеге асты, деп хабарлайды Azattyq Rýhy.

Қылмыстық топтың схемасы

Трансұлттық қылмыстық топ жалған онлайн-брокерлер арқылы азаматтарға инвестицияны «қайтарып береміз» деп алдаған.

Алаяқтар:

• өздерін заңгер ретінде таныстырған,
• deepfake технологиясын пайдаланып бет-бейнесін жасырған,
• «сот» немесе «салық органдары» атынан хабарласқан,
• жәбірленушілерді «комиссия» мен «салық төлеуге» көндірген,
• кейде несие алуға немесе мүлкін сатуға мәжбүрлеген.

Алдын ала дерекке сәйкес, 4,5 мыңнан астам шетелдік азамат, оның ішінде қазақстандықтар да зардап шеккен. Келтірілген шығын көлемі – 4 млн АҚШ долларынан асады.

Қылмыстық топтың құрылымы

Топ нақты иерархия бойынша жұмыс істеген:

• ұйымдастырушылар мен үйлестірушілер,
• техникалық басшылар,
• жәбірленушілермен байланыс орнататын орындаушылар болған.

Call-орталықта шамамен 30 адам еңбек еткен. Операторлар алаяқтық жолмен түскен қаражаттан пайыз алып отырған. Түскен табыс элиталық жылжымайтын мүлікке, қымбат көліктерге және жер телімдеріне жұмсалған.

Тінту және дәлелдемелер

11 мекенжайда жүргізілген тінту кезінде:

• 41 компьютер,
• 24 ұялы телефон,
• sim-карталар мен басқа да дәлелдемелер тәркіленді.

Құрылғылардан қазақстандық байланыс операторларының абоненттік базалары табылып, қылмыстық әрекеттің мақсатты түрде жасалғаны анықталды.

Ұсталғандар мен тергеу жалғасы

Операция барысында 15 Украина азаматы ұсталды, оның 9-ы уақытша ұстау изоляторына қамалды. Қазақстандық тарап украин әріптестерімен бірге қосымша эпизодтар мен шығын көлемін анықтауда.

Ресми пікір

ҚР ІІМ Киберқылмысқа қарсы іс-қимыл департаменті бастығының орынбасары Аслан Өскембаевтың айтуынша, бұл операция трансұлттық киберқылмысқа елеулі соққы беріп, азаматтарды алаяқтық схемалардан қорғауға мүмкіндік берді.