Қостанай облысында әлеуметтік сақтандыру қоры жүкті әйелді ақшасыз қалдырмақ болды

Қостанай облысында әйел адам әлеуметтік сақтандыру қорын сотқа берді. Айтуынша, ол декреттік демалысқа шығар алдында жұмыссыз қалып, төлемнен қағылған, деп хабарлайды Azattyq Rýhy.

Істің мән-жайы

Әйелдің айтуынша, ол декреттік демалысқа шығар алдында жергілікті ЖШС-нің бірінде жұмыс істеген. Алайда қорға әлеуметтік төлем алу үшін берген өтініші қабылданбаған.

Сотта атап өтілгендей, қордың бас тартуына еңбек шартының заңдылығына күмән келтірілуі және жұмыс берушінің әлеуметтік аударымдарды толық төлемеуі себеп болған.

Соттағы дәлелдер

Процесс барысында ЖШС өкілі әйелмен ресми еңбек қатынастары болғанын растап, тиісті құжаттарды ұсынды.

Медиация арқылы шешім

Тараптар медиативтік келісімге келген. Оның шарттарына сәйкес, қор әйелдің өтінішін сотқа ұсынылған құжаттарды ескере отырып қайта қарайды. Ал талапкер өз талабын толық көлемде қайтарып алып, өкіл қызметіне кеткен шығын бойынша қордан ешқандай талап қоймайды.