Талғарда ер адам оққа ұшып, қасындағы екі жасар қыз ұрланды

Алматы облысының Талғар қаласында ер адам оққа ұшып, екі жасар қыз бала ұрланды. Бұл туралы облыстық Полиция департаменті мәлімдеді, деп хабарлайды Azattyq Rýhy. 

Оқиға куәгерлерінің айтуынша, күдікті мен жәбірленуші әйел, яғни, баланың анасы бұрын жақын қарым-қатынаста болған. Алайда олардың арасында жанжал шығып, соның салдарынан күдікті жігіт әйелдің ағасын мылтықпен атып өлтірген.

Қанды қылмыстан кейін ол әйелдің кішкентай қызын (2019 жылы туған) күштеп алып кеткен.

Полицияның ресми мәлімдемесі

«Ер адамды өлтіру және кәмелетке толмаған баланы ұрлау фактілері бойынша қылмыстық істер қозғалды. Күдіктінің жеке басы анықталды, оның қайда жүргені белгілі. Қазіргі таңда оны ұстау шаралары жүргізіліп жатыр», – делінген полицияның хабарламасында.

Сонымен қатар барлық мән-жайды анықтау үшін кешенді жедел-тергеу іс-шаралары жүргізілуде.