Алматыда заңсыз салынған ондаған нысан бұзылды – әкімдік

Алматыда қала аумағында заңсыз салынған ондаған нысан бұзылды, деп хабарлайды Azattyq Rýhy.

Қала әкімдігінің мәліметінше, сот шешімімен қала аумағындағы 33 заңсыз салынған нысан толық немесе жартылай бұзылды.

Қала құрылысын бақылау басқармасының талап-арызы бойынша тағы 64 нысанды бұзу қажет. Оларға қатысты сот шешімдері қазір қалалық Әділет департаментінде орындалу сатысында тұр.

«2025 жылдың басынан бері заң талаптары мен құрылыс нормаларын бұзғаны үшін сотқа 68 талап-арыз жолданды. Оның 35-інде нысандарды толық немесе жартылай бұзу көзделген», – делінген әкімдік хабарламасында.