«Емшілердің 90 пайызы – шарлатан»: «Үкілі бала» тәуіптердің былығын жайып салды (ВИДЕО)

Осыдан он шақты жыл бұрын емшілігімен аты шығып, «Үкілі бала» атанған Ерболсын Серікбаев бала күнгі былығын жайып салды, деп хабарлайды Azattyq Rýhy.

«Үкілі бала» емшілікпен айналысқан балалық шағындағы кезең туралы еске алды.

«Шыны керек, оларға жаным ашиды. Бір кездері өзім де адам қабылдадым. Келген адамдарды қабылдайсың. Науқас адамның қандай жағдайда келіп отырғаны қызық емес, олардың беретін мүмкіндіктеріне көзің түседі. Ол – қазір көп емшілердің басты көзірі. Сен науқастың жазылып кетуіне емес, науқастан «қанша ақша ала аламын?» деген ниетпен жасайсың. Өкініштісі, ол санасыз деңгейде өтеді. Яғни, сен өзіңді сол кезде дұрыс жасап жатырмын» деп ойлайсың», — дейді ол.

Ол сөзін жалғай отырып, емшілердің басым бөлігі алаяқ екенін нықтап тұрып айтты.

«Негізі емшілердің 90 пайызы – қасиетке ие емес адамдар. Шарлатанның ар жақ бер жағы. Бұл сөзімді тек салыстырмалы түрде айтып жатырмын. Өйткені кезінде өзім жұртты қалай емдегенімді білемін. Мәселен, онкологияға шалдыққан науқасқа міндетті түрде ота, химиятерапия керектігін, одан кейін ол үй жағдайында емделуі керектігін білетінмін. Көптің бірі болып емделіп шығып жатады. Бірақ оның түбі нәтижесі жоқ. Ал осының арқасында сенің қалтаң қалыңдап жатыр», - дейді бір кездергі «үкілі бала».