Жамбыл облысы полиция департаменті басшысының экс-орынбасары ұсталды
Ол қызметтен босатылып, қамауға алынды
Жамбыл облысы полиция департаменті бастығының бұрынғы орынбасары ұсталды. Бұл ақпаратты ҚР Ішкі істер министрлігі растады, деп хабарлайды Azattyq Rýhy.
Қызметтен босатылып, қамауға алынды
Министрліктің ресми мәліметінше, 29 тамыз 2025 жылы аталған лауазымды тұлға теріс себептермен қызметтен босатылған.
Кейін ол ІІМ-нің Ішкі қауіпсіздік департаменті тарапынан ұсталып, уақытша ұстау изоляторына қамауға алынды.
«Департамент басшысының бұрынғы орынбасары заңға қайшы әрекет жасады деген күдікке ілінді. Қазір оған қатысты сотқа дейінгі тергеу амалдары жүргізіліп жатыр», – делінген ІІМ хабарламасында.
Министрліктің ұстанымы
ІІМ ресми өкілдері заң мен антты бұзған қызметкерлердің жауапкершіліктен қашып құтыла алмайтынын атап өтті.
«Министрлік заң мен тәртіпті қорғау ісінде принципшіл позицияны ұстанады. Қызметтік борышын атқаруда заңнан аттағандар міндетті түрде анықталып, жауапқа тартылады», – деп хабарлады ведомство.
