Қасым-Жомарт Тоқаевтың мақаласы 350 млн адам оқитын газетте жарияланды
Мақалада Қазақстан мен ҚХР арасындағы жан-жақты стратегиялық серіктестікті дамыту мәселесі қозғалды
350 млн адам оқитын танымал қытай газетінде мемлекет басшысы Қасым-Жомарт Тоқаевтың мақаласы жарияланды. Бұл туралы президенттің баспасөз хатшысы Руслан Желдібай әлеуметтік желідегі парақшасында жазды, деп хабарлайды Azattyq Rýhy.
«Бүгін Қытайдың ағылшын тілді танымал Сhina Daily газетінде Президент Қасым-Жомарт Тоқаевтың «Strong Kazakh-Sino ties key to successful cooperation» («Қазақстан мен Қытайдың берік қарым-қатынасы – табысты ынтымақтастық кепілі») атты мақаласы жарық көрді», - деп атап өтті Желдібай.
Мақалада Қазақстан мен ҚХР арасындағы жан-жақты стратегиялық серіктестікті дамыту, сондай-ақ Шанхай ынтымақтастық ұйымының әлеуетін нығайту тақырыптары қозғалған.
Газеттің дүниежүзілік таралымы – 700 000 дана. Басылымның газет, онлайн және мобильді нұсқаларын әлем бойынша 350 миллионнан астам адам оқиды.
Мақаланы мына сілтеме арқылы оқуға болады.
