Қазақстан елшілігі Мәскеу аймағында жұмыс істейтін отандастарымызға үндеу жасады

Қазақстанның Ресейдегі елшілігі миграциялық есепке алу тәртібінің өзгеруіне байланысты Мәскеу қаласы және Мәскеу облысында жұмыс істейтін қазақстандықтарға үндеу жасады, деп хабарлайды Azattyq Rýhy.

Елшіліктің мәліметінше 2025 жылғы 1 қыркүйектен бастап астаналық өңірінде Ресейге визасыз баратын бірқатар мемлекет азаматтарының орналасқан жерін есепке алудың эксперименттік режимі енгізіледі, ол федералдық заңнамаға сәйкес жүргізіледі және көші-қон есебінің қолданыстағы тәртібін ауыстыруды көздейді.

«Мәскеу қаласы және Мәскеу облысына жұмыс істеу үшін келген Қазақстан азаматтарына міндетті түрде «Амина» арнайы мобильді қосымшасын орнату қажет болады. Ол шетелдік азаматтарды есепке алуды жеңілдетіп, көші-қон заңнамасын адал сақтайтын шетелдіктер үшін бұл үдерісті одан әрі ыңғайлы және қолжетімді етуге арналған», - деп жазылған хабарламада.

Бұл талаптан кәмелетке толмаған адамдар (18 жасқа дейін) жастар, дипломаттар және халықаралық ұйымдардың қызметкерлері, сонымен бірге олардың отбасы мүшелері босатылады.

«Амина» Көпфункционалды көші-қон орталығының (ММЦ) мекенжайы бойынша тіркелуге және ішкі істер органдарын тұратын жері (шетелдік азамат ұйықтау және демалу үшін үнемі пайдаланатын) және оның ауысуы туралы мобильді қосымша арқылы қашықтан хабардар етуге мүмкіндік береді», - деп түсіндірді ведомство.

«Аминаны» Көпфункционалды көші-қон орталығына немесе Ресей ІІМ аумақтық органдарына бармай-ақ дербес орнатуға болады.

Әрі қарай мобильді қосымшада авторизациялау үшін шетелдік азаматтың қолданыстағы картасы қажет. Оны ресімдеу үшін көпфункционалды көші-қон орталығына жүгінеді. Карта жоғалған жағдайда «Аминаға» авторизациялау үшін паспорттық мәліметтерді енгізу жеткілікті.

Мобильді қосымша геолокация арқылы ақпаратты Ресейдің ІІМ-не жібереді. ІІМ органдары мәліметтердің бірнеше күн бойы берілмегенін тіркесе, онда азаматқа орналасқан жерінің мекен-жайын растау немесе оның өзгергені туралы Ресейдің ІІМ -не хабарлау қажеттілігі туралы хабарлама келеді. Бұл үшін ішкі істер органдарына немесе Көші-қон орталығына бару талап етілмейді.

Соңғы мониторинг күнінен бастап абоненттік құрылғының геолокациясы туралы мәлімет үш жұмыс күнінен артық түспеген жағдайда азамат Көші-қон орталығының мекенжайы бойынша есептен шығарылады. Эксперимент енгізілгеннен кейін мониторинг шарттарын бұзу азамат туралы мәліметтерді Бақыланатын тұлғалардың тізіліміне енгізуге негіз бола алады.

«Көші-қон есебіне эксперимент жүргізіліп жатқан аумақтардан тыс жерде қойылған немесе елден шыққан жағдайда азамат ККО мекенжайы бойынша есептен шығарылады, тиісті хабарлама «Амина» мобильдік қосымшасы арқылы келіп түседі. Болашақта «Амина» қосымшасын мониторинг функцияларынан басқа, пайдаланушылар үшін өзге де қажетті мүмкіндіктер пайда болады. Мысалы, онда патент төлеуге, көші-қон орталығына бару үшін алдын ала жазылу және т.б. қызметтер қарастырылады», - деп толықтырды елшілік.

Эксперимент басталғанға дейін қосымшаны тестілеу режимінде қолдануға болады, бұл оның функционалын алдын-ала зерттеуге көмектеседі.

«Амина» қосымшасын тек бір ресми көзден – ресейлік RuStore қосымшалар дүкенінен жүктей аласыз. Google Play немесе Apple App Store дүкенінен іздеу нәтиже бермейді немесе көші-қон есебіне қатысы жоқ бейресми қолданбаларды жүктеуге әкеледі. Бейресми дереккөздерді пайдалану қауіпті, себебі ол жеке басын ұрлауға немесе зиянды бағдарламаны орнатуға әкелуі мүмкін.

«Амина» қосымшасына қатысты жиі қойылатын сұрақтарға жауаптарды мына сілтеме бойынша көруге болады.