Түркістан облысында қола дәуірінің құнды жәдігерлері табылды
Барлық табылған бұйым «Ордабасы» ұлттық тарихи-мәдени қорық-музейінің қорына өткізіледі
Түркістан облысының Ордабасы ауданындағы Бөген су қоймасының маңында жүргізілген археологиялық қазба жұмыстары барысында қола дәуіріне тиесілі аса құнды жәдігерлер табылды, деп хабарлайды Azattyq Rýhy өңір әкімдігінің баспасөз қызметіне сілтеме жасап.
Белгілі археолог А.Н. Подушкин жетекшілік еткен ғылыми экспедициялық қазба жұмыстары нәтижесінде 60–40 мыңжылдық кезеңіне жататын тас құралдар, алтынмен көмкерілген әшекейлер, қоладан жасалған білезіктер мен тұрмыстық бұйымдар, жауынгердің қару-жарақтары, ортағасырлық мыс тиындар табылды.
«Мамандардың айтуынша бұл – Орталық Азия тарихы үшін тың жаңалық, себебі мұндай жәдігерлер алғаш рет Орта Азия бойынша Ордабасы аумағынан табылып отыр», - деп жазылған хабарламада.
Барлық табылған бұйым ғылыми тұрғыда зерттеліп, «Ордабасы» ұлттық тарихи-мәдени қорық-музейінің қорына өткізіледі.
Бұл жұмыстар Ордабасы өңірін ежелгі өркениет пен мәдениеттің маңызды орталығы болғанын айғақтайды.
