Алматы әуежайында жолаушы өз тамағын өткір затпен орып жібермек болды

Алматы халықаралық әуежайында терминал дәретханаларының бірінде жолаушы өз-өзіне қол жұмсамақ болды. Оқиғаның мән-жайын әуежайдың баспасөз қызметі мен көліктегі полиция департаменті түсіндірді, деп хабарлайды Azattyq Rýhy.

Әуежай әкімшілігі оқиғаның болғанын растады.

«Ішкі рейстердің Т1 терминалында жолаушы дәретхана бөлмесінде өз денсаулығына зиян келтірмек болған. Жағдайды әуежай қызметкерлері бірден байқап, дереу медициналық қызметке хабарласқан. Жедел жәрдем бригадасы келгенше жолаушыға дер кезінде алғашқы медициналық көмек көрсетілді», - деп хабарлады әуежай.

Қазіргі уақытта оның өміріне қауіп төніп тұрған жоқ, жолаушы дәрігерлердің бақылауында. Әуежай қалыпты режимде жұмысын жалғастыруда.

Көліктегі полиция департаменті аталған факті бойынша Алматы әуежайындағы желілік бөлім қылмыстық іс қозғағанын хабарлады.

«Алматы-Астана» рейсінің жолаушысы әуежайға аман-есен жетіп, тіркелу мен тексеруден өткен, кейін жолаушыларды отырғызуды күткені алдын ала анықталды. Белгісіз себептермен ер адам ұшаққа отырмай, төрт сағат күту залында, соның ішінде дәмханада отырған. Содан кейін ол күтпеген жерден санитарлық бөлмеге кіріп, дене жарақатына әкеп соқтырған әрекеттерді жасаған. Әуежайдың медициналық қызметі оған алғашқы медициналық көмек көрсетті, кейін ол қалалық клиникалық ауруханаға жеткізілді», - деп хабарлады көліктегі полиция департаменті.

Қазір оқиғаның барлық мән-жайын анықтау үшін тергеу амалдары жүргізіліп жатыр.

Еске салайық, Алматы әуежайында осыған ұқсас оқиға 25 тамыз күні сағат 22:06-да болды. Ол кезде Т-1 терминалында билет кассасының жанында ер адам өзін өртеп жіберді. Полиция қызметкерлері қауіпсіздік қызметімен бірлесе отырып, өрт сөндіргішпен жалынды тез арада сөндіріп, жедел жәрдем шақырған. Ер адам қалалық ауруханаға жеткізілді.