Түркістанда әйелін қызғанып, жедел жәрдем қызметкерін соққыға жыққан ер адамға кешірім берілді

Түркістанда қызғаныштан жедел жәрдем фельдшерін ұрып-соққан ер адам қамауға алынды, деп хабарлайды Azattyq Rýhy.

Otyrar.kz мәліметінше, 26 жастағы фельдшер Құдірет Мұталипов жарақат алып, ауруханаға жеткізілді. Дәрігерлер оның жағдайын орташа ауыр деп бағалады.

Облыстық жедел жәрдем станциясының фельдшері аппендицитке күдікпен шақыртуға барған. Науқас әйелді тексеру кезінде күйеуі араласып, фельдшерді ауруханаға жатқызу құжаттарын толтырып жатқан сәтте соққыға жыққан.

«Ол отырған кезде ер адам бетінен қатты ұрды. Кейін тағы да беті мен иығынан ұрды. Осыдан кейін оны анасы ажыратып алды», – дейді оқиғаның куәгері Жанел Қуанышбек.

Оқиға орнына полиция және жедел жәрдемнің тағы бір бригадасы келді. Жарақат алған фельдшер Түркістан қалалық ауруханасына жеткізілді.

«Науқас жабық бас-ми жарақатымен, ми шайқалуымен және көз аймағында гематомамен түсті. Жағдайы – орташа ауыр», – деді бас дәрігер Бекзат Берденов.

Сот-медициналық сараптама тағайындалды. Ал фельдшер пікір беруден бас тартты және полицияға арыз жазған жоқ.

«Тараптар өзара сөйлесті, ер адамға кешірім берілді. Шағым түскен жоқ. Полиция бұл оқиғаны тіркеуі тиіс. Біз ақпаратты еңбек инспекциясына жолдаймыз», – деді жедел жәрдем станциясының заңгері Нұрмұхан Абдулла.

Станция дерегінше, бұл – биыл Түркістанда жедел жәрдем қызметкері қызметтік міндетін атқарып жүрген кезде соққыға жығылған алғашқы жағдай.