Алматыда жоғары қабаттың терезесінде теңселіп, құлауға шақ қалған сәби құтқарылды

Алматыда көпқабатты үйдің жоғары қабатының терезесінде теңселіп, құлауға шақ қалған сәби құтқарылды, деп хабарлайды Azattyq Rýhy.

Қалалық Полиция департаментінің мәліметінше, Алматы қаласының Алатау ауданында жылдам қимылдайтын арнайы жасақтың аға инспекторы, полиция подполковнигі Мырзабек Сейтенов қайғылы жағдайдың алдын алды. Қызметтік міндетін атқарып жүрген кезінде полицей, көпқабатты үйдің терезесінен орындықтың үстінде тұрып, терезе алдында теңселіп тұрған баланы байқайды.

Ол дереу әрекет етіп, пәтерді анықтап, кіреберіске көтеріліп, баланы қауіпсіз жерге шығарды. Абырой болғанда, оқиға сәтті аяқталды. Баланың ата-анасына ескерту мен профилактикалық түсіндіру жүргізілді.

«Біздің қызметкеріміз мұқияттылық пен кәсібилік танытып, баланың өмірін сақтап қалды. Алайда бұл – барлық ата-ана үшін алаңдатарлық белгі: балаларды, әсіресе терезе мен самалдық маңында қараусыз қалдырмаңыздар», – деді Алматы қалалық ПД жылдам қимылдайтын арнайы жасақтың командирі Азамат Есерғожин».

Полиция ескертеді: жаз мезгілінде және оқу жылының басында балалардың терезеден құлау оқиғалары жиілейді. Ата-аналарға терезеге бекіткіш пен блокатор орнату, терезе маңына жиһаз қоймау және балаларды үнемі бақылауда ұстау қатаң түрде ұсынылады.